El Gobiernu aprueba la oficialización de la toponimia tradicional de Tapia, San Tiso d’Abres y Peñamellera Alta

El Conseyu de Gobiernu dio’l preste esti miércoles a trés decretos toponímicos que faen oficiales los nomes de llugar tradicionales de Tapia, San Tiso d’Abres y Peñamellera Alta. D’esta forma, yá son 59 los conceyos del país que recuperen los topónimos asturianos.

D’una tirada aprobáronse trés espedientes d’oficialización toponímica, de los que sorprende’l de San Tiso d’Abres, yá que les últimes informaciones del Gobiernu nun incluyía’l decretu d’esti conceyu del occidente ente los que teníen el procesu avanzáu. Nesa llista sí taben Cabrales, Llanera, Castropol, Cuaña, Les Regueres, Onís y Somiedu.

Mentes, sí s’esperaba la lluz verde pal decretu de Tapia y Peñamellera Alta dientru d’un procesu de recuperación de la toponimia tradicional que completaron yá 59 de los 78 conceyos asturianos. Amás de los citaos, tienen en marcha l’espediente abiertu Cuideiru, Villayón, Ayande, Caravia, Ibias, Peñamellera Baxa, Salas, Uviéu y Muros, mentes que ta previsto que lo soliciten en meses próximos Eilao, Navia y Pravia.

La toponimia tradicional de Tapia, San Tiso d’Abres y Peñamellera Baxa va espublizase nunos díes nel Boletín Oficial del Principáu d’Asturies (BOPA), momentu nel que van pasar a ser oficiales dafechu, derogando los nomes de llugar castellanos.