El tiempu da una tregua hasta’l domingu

|
Temporal accesu a Cuevas Nueva iguada

Asturies sigue sufriendo les consecuencies del temporal d’agua y aire que ximielgó’l país nos díes últimos y que provocó la muerte de cuatro persones. El tiempu va dar una tregua de dos díes, hasta’l domingu, cuando s’espera un temporal nuevu con nieve.

Según la predicción de l’Axencia Estatal de Meteoroloxía (Aemet), Asturies va tar n’alerta mariella por nevaes nel cordal y picos dende les 6 hores del domingu, mentes que tola mariña va tar n’alerta naranxa por fenómenos costeros dende les 10 hores nel occidente y dende les 12, nel oriente. Espérase acumulaciones de nieve de 5 centímentos a partir de 900 metros y de 7, dende los 1.200 metros.

Hasta entós Asturies va vivir xornaes con ausencia d’agua y inclusive sol, mañana. Una tregua depués de dos díes de temporal y aire qu’entovía dexar ver les sos consecuencies.

El 112 Asturies apunta que de les 137 incidencies que se rexitaron na rede viaria, ayeri taben solucionaes 28. Dada la situación, recomienda a la ciudadanía precaución nos sos desplazamientos, sobre manera nes carreteres llocales.

Nestos momentos namái hai un ríu n’alerta, el Narcea nel so pasu per Quinzanas, nel conceyu de Pravia. Ayeri’l númberu de puntos peligrosos ascendía a siete.

Regresen los pacientes a Les Arriondes

El Comité de Dirección del Plan d’Inundaciones del Principáu d’Asturies (PLANINPA), activu en fase d’emerxencia en situación 0  dende les 10.09 del miércoles, decidió na tarde d’ayeri, tres analizar la previsión meteorolóxica y la situación de los niveles de los ríos, l’apertura del Hospital del Oriente Francisco Grande Covián, evacuáu’l mesmu miércoles. La operación ta faciéndose de manera progresiva, comenzando pol serviciu d’Urxencies.

Agora ye’l momentu d’evaluar los daños provocaos pol temporal en tol territoriu, que tán afeutando sobre manera al serviciu de Feve. Javier Fernández, presidente del país, aseguró dende Madrid que nun descarta estudiar el pidimientu de declaración de zona catastrófica.

Na imaxe, estáu de la carretera d'accesu a la sablera de Cuevas, en Nueva. Semeya propiedá de l'Alcaldía de Barrio de Nueva.

Contador Estadistiques