El temporal provoca la muerte de cuatro persones

Cuatro persones muertes ye’l balance que ta dexando n’Asturies el temporal d’agua y viento, que vivió’l miércoles el so momentu cimeru. Al menos dos decenes d’incidentes tán abiertos nel país, ente los que destaca’l corte de la N-634 en Triongu.

Les predicciones de l’Axencia Estatal de Meteoroloxía (Aemet) afiten el final del periodu d’alerta pa les 14 hores na zona del cordal y Picos, cuando’l tiempu comenzará a estibilizase, anque nun van faltar la lluvia nel país hasta la tarde de mañana. Atrás queden dos xornaes de muncho agua y aire que provocaron inundaciones en dellos puntos d’Asturies y obligaron a evucuar na mañana d’ayeri l’Hospital del Oriente Francisco Grande Covián y güei la central térmica de Lada.

Sicasí, lo peor son les víctimes mortales por mor de les consecuencies del temporal. En Llaviana finó esta mañana a causa d’un argayu un home de 62 años na carretera de Sertera cuando taba nun vehículu paráu a la espera de recoyer a un home. Nel mesmu incidente acabaron firíes otres dos persones.

Un vecín de Tinéu de 41 años desapaecíu na tarde d’ayeri en Pena, cuando marchara a mirar les condiciones nes que taba un prau, foi atopáu muertu esta mañana nel ríu Porciles, que tenía que cruciar, unos 100 metros más abaxo del pueblu. En Salas, cerca del centru eólicu de Curiscao, tamién esta mañana, una persona de 42 años cayía col so vehículu per un desnivel de 500 metros, perdiendo la vida.

La incidencia última foi la muerte en La Coḷḷadieḷḷa, en Mieres, d’un home de 70 años cuando un vehículu cayó por otru desnivel, nesti casu de 50 metros, depués de que’l firme de la carretera viniera abaxo. La vía, l’AS-337, ta cortada en dos puntos kilométricos: el 9 y el 10.

Siete ríos n’alerta

Asturies tien activao’l Plan d’Inundaciones del Principáu d’Asturies (PLANIPA) en fase d’emerxencia en situación 0 dende les 10.09 hores d’ayeri, cuando se rexistraron 2.069 llamadas con 159 incidentes: 34 inundaciones, 61 cortes de carretera y 7 llimpieces viaries. El 112 Asturies tien abiertes agora dos decenes d’incidencies, 7 venceyaes a inundaciones y 16 cola rede viaria.

Ente estes últimes destaca’l corte de la N-634, ente los puntos quilométricos 327 y 341, en Cangues d’Onís al altor de Triongu. Mentes, la Confederación Hidrográfica de Cantábricu caltién siete puntos n’alerta n’Asturies pola xuba del nivel del agua en ríos.

El mal tiempu tamién causó problemes na rede ferroviaria. Son numberoses les incidencies y cortes en tol territoriu, dexando imáxenes espectaculares, como una vía nel aire en Barredos.

Na imaxe, puestu de mandu avanzáu de Bomberos d'Asturies treslladáu a Les Arriondes. Semeya propiedá del 112 Asturies.