El taller nuevu d'historia d'Asturies de Corvera va centrase nel sieglu XIX

Va principiar el día 11 con sesiones de dos hores tolos miércoles en Les Vegues.

La Guerra la Independencia, la cayida del Vieyu Réxime, la Restauración, el republicanismu y el carlismu, la prensa y la lliteratura, la industrialización y el movimientu obreru son dalgunos temes que se van tratar nuna edición nueva del taller 'Una entruga pa cada historia', centráu nesta ocasión nel sieglu XIX. El téunicu responsable del Serviciu de Normalización Llingüística de Corvera y llicenciáu n’Historia pola Universidá d’Uviéu y postgráu n’Archivística pola UNED, Rafael Rodríguez Valdés, encárgase de poner les clases, que se completen con charres temátiques d'espertos.

Esti cursu sobre la historia d'Asturies, de calter gratuitu y con una duración de venti hores, va desarrollase tolos miércoles dende'l día 11 n’horariu de 18 a 20 hores nel aula 2 del Centru Sociocultural de Les Vegues. La matrícula va tar abierta hasta'l mesmu día 11, pudiendo formalizase nos rexistros municipales del Conceyu de Corvera.