Entámase en Corvera un taller nuevu sobre historia d'Asturies

Va comenzar esti miércoles, acompáñase de trés conferencies abiertes al públicu y va centrase nesta ocasión nos sieglos XVII y XVIII.

'Una entruga pa cada historia' ye'l nome d'esta esperiencia recuperada en Corvera na primavera depués d'una primera nel 2014. Tien como oxetivu introducir la historia d'Asturies a les persones interesaes, "siempre dende un plantegamientu abiertu y rigurosu, col que s'averen a cuestiones como la repercusión de los productos americanos na alimentación, la cultura na Edá Moderna, los efeutos de las guerres de la Corona castellana, la Ilustración..., amás d'otros temes".

El periodu estudiáu nesta ocasión ye, poro, los sieglos XVII y XVIII, yá tocaos nel anterior taller, cuando tamién s'afondó nel XV y XVI. L'historiador Rafael Rodríguez Valdés, téunicu responsable del Serviciu de Normalización Llingüística de Corvera, va encargase de conducir les sesiones dende esti miércoles, fecha hasta la que ye posible matriculase de baldre nos rexistros del Conceyu de Corvera.

Con una duración de catorce hores, el taller va desendolcase tolos miércoles n'horariu de 18 a 20 hores nel Aula 2 del Centru Sociocultural de Les Vegues.

Participación d'espertos

Esta iniciativa acompáñase tamién de trés conferencies d'espertos na dómina moderna, abiertes al públicu. La primera va ser el mesmo miércoles, a cargu de Marta Mori, que va falar de 'Los anicios de la lliteratura asturiana culta: sieglos XVII-XVIII'.

El 13 de payares va desplazase a Les Vegues Faustino Zapico, pa esplicar 'El misteriu de la Ilustración asturiana', siendo'l convidáu últimu Xuan Fernandi Bas, que'l 4 d'avientu va falar sobre 'Cases, casones y palacios. La vivienda rural na Asturies de los sieglos XVII-XVIII'.