El taller d'historia de Corvera llega al sieglu XX

'Una entruga pa cada historia' vuelve esta seronda con diez sesiones de dos hores.

Les repercusiones n'Asturies de la perda de Cuba, l'impautu de la I Guerra Mundial, l'autonomismu, la fin de la Restauración, l'apaición del Partíu Reformista, la prensa y la lliteratura, la industrialización y el movimientu obreru o la dictadura de Primo de Rivera, ente otres cuestiones más, van tratase nel taller d'historia de Corvera, que yá llega al sieglu XX, centrándose en concreto nel primer terciu de la centuria. L'historiador y téunicu de la Casa de la Llingua, Rafael Rodríguez Valdés, va encargase a poner les clases, dende mañana, tolos miércoles de 18 a 20 hores.

L'Aula 2 del Centru Sociocultural de Les Vegues va acoyer esta iniciativa de baldre que vien repasando los últimos sieglos de la historia del país, "siempres dende un planteamientu abiertu y rigorosu al empar". Hasta mañana, primer día del cursu, les persones interesaes pueden inscribise nos rexistros del Conceyu de Corvera.