El programa pa recuperar talentos científicos nun recibe nenguna solicitú

Fracasa la iniciativa del Gobiernu a la que tenía previsto destinar 622.500 euros.

Los talentos científicos que se vieron obligaos a colar del país pa desendolcar el so llabor profesional d'una manera digna nun tornen a casa. Y nun ye por falta de ganes. El Plan de Retornu del Talentu que punxo en marcha'l Gobiernu en xunetu y que formaba parte del alcuerdu del PSOE con Izquierda Xunida pa la investidura de Javier Fernández nun recibió nenguna solicitú, previsiblemente porque sólo aseguraba dos años de contratu n'Asturies.

El conseyeru d'Emplegu, Industria y Turismu, Francisco Blanco, dio los datos del Plan na Comisión d'Emplegu y Industria tres una entruga al respeuto de Lorena Gil, diputada de Podemos Asturies. El socialista reconoció nun saber los motivos del fracasu del programa de retornu de talentos y defendió la difusión fecha de la ufierta. La so intención agora ye abrir un plazu nuevu y redoblar esfuercios pa convertir en ésitu esta iniciativa.