El Gobiernu va destinar 622.500 euros a recuperar talentos científicos

|

El Plan de Retornu del Talentu busca recuperar a aquellos profesionales que se vieron obligaos a marchar a trabayar fuera pola ausencia de posibilidaes nel país. El Gobiernu destina 622.500 euros pa esta iniciativa que forma parte del alcuerdu con IX pa la investidura de Javier Fernández.

El programa, aprobáu ayeri en Conseyu de Gobiernu, non sólo pretende estimular el regresu a Asturies de titulaos universitarios residentes nel estranxeru, sinón que tamién permitirá que les compañíes y centros científicos nacionales aprovechen el conocimientu y la esperiencia adquiríos n'otros estaos polos destinatarios de les ayudes. El Plan afita subvenciones pa la contratación, cubriendo'l 80 por cientu del costu del trabayador mientes dos años, con un máximu de 40.000 euros añales.

La duración mínima del contratu será de 24 meses y la retribución mínima, de 30.000 euros brutos al año. Tamién se pretende cubrir los gastos de treslláu, con un máximu de 3.000 euros.

N'árees determinaes

Les actividaes han d'enmarcase nes árees definíes na Estratexa d'Especialización Intelixente RIS3 Asturies, esto ye, materiales avanzaos y sostenibles, modelos de producción nuevos, suministros y teunoloxíes pa redes, el polu industrial del aceru, mercaos agroalimentarios y avieyamientu demográficu y calidá de vida. A los aspirantes esixiráse-yos, amás de que residan anguaño nel estranxeru, l'acreditación d'esperiencia n'actividaes d'I+D+i.

También valoraránse cuestiones como el currículu, les perspeutives d'estabilidá llaboral, el venceyu con actividaes d'I+D+i mientres más de cinco años y la posesión del títulu de doctor. Nel casu de les empreses, tendráse en cuenta la so trayeutoria, el plan de contratación, l'apuesta por contratos indefiníos y la calidá y el grau d'innovación de la actividá subvencionada.

Contador Estadistiques