Podemos señala a la falta de garantíes de futuru como razón del fracasu del Plan de Retornu

"Ye difícil que los investigadores se sumen al plan si ésti nun-yos garantiza un futuru n'Asturies más allá de los dos años que prevé la convocatoria", diz la diputada Lorena Gil.

El Plan de Retornu del Talentu que punxo en marcha'l Gobiernu en xunetu con un presupuestu de 622.500 euros y que formaba parte del alcuerdu del PSOE con Izquierda Xunida pa la investidura de Javier Fernández, nun recibió nenguna solicitú, una situación que'l conseyeru d'Emplegu, Industria y Turismu, Francisco Blanco afirmó nun saber esplicar na Comisión d'Emplegu y Industria. La parllamentaria de Podemos Asturies, que tresllado esta cuestión a Blanco, llamentó tres la reunión que se se diera esta situación y afala al Gobierno a “abrir una reflexón pa enfocar de manera afayadiza un plan d'estes carauterístiques”.

Tamién amosó la so disconformidá con que "el conseyeru nun informara de los contautos que se caltuvieron con empreses asturianes que pudieren acoyer a los investigadores, nin tampoco los manteníos colos propios investigadores pa tomar el pulsu de les sos necesidaes nel casu de regresar pa continuar equí cola so carrera”. Nesi sen, punxo en dulda que “les condiciones pal retornu de los aspirantes fuera l'afayadiza al non garantiza-yos un futuru n'Asturies más allá de los dos años que prevé la convocatoria”.

Similar al Programa Xovellanos

Podemos Asturies apuesta por un plan "con unos oxetivos nidios, que tome en consideración les necesidaes de les empresas asturianes y que resulte atractivu p'aquelles personas que tán desarrollando la so carrera nel esterior y desean volver pa quedar". Tamien cree clave la collaboración del Gobiernu, la Universidá d'Uviéu y la empresa "pa crear un verdaderu ecosistema en materia d'investigación, desarrollu teunolóxicu y innovación na nuesa comunida autónoma, lloñe d'actuaciones sueltes y convocatories que s'asolapen", en referencia al Programa Xovellanos, del 2011, mui asemeyáu al Plan de Retornu de Talentu y que namái tuvo una solicitú en seis años.