El procesu de recuperación toponímica encara’l so tramu final tres l’aprobación del decretu d’Eilao

El Conseyu de Gobiernu dio’l preste al decretu pol que se determinen los topónimos oficiales d’Eilao, convirtiéndose nel sesentenu sestu conceyu en dar esti pasu. El procesu de recuperación toponímica encara asina’l so tramu final: los 12 pendientes tienen l’espediente abiertu.

Eilao foi l’últimu conceyu en solicitar la revisión de la so toponimia, pero yá cuenta colos nomes de llugar tradicionales recuperaos por mor del so tamañu pequeñu. De los que falten por desendolcar con esti llabor los más avanzaos son Cabrales, Llanera, Castropol y Somiedu.

Mentes, en diferentes fases del procesu tán Cuideiru, Ayande, Caravia, Ibias, El Valle Baḥu de Peñamellera, Salas, Navia y Pravia. En total, 12 que completaríen los 78 conceyos que conformen el país.

Catorce años

Cola aprobación de la Llei d’Usu y Promoción del Bable/Asturianu, del 1998, abrióse la posibilidá de recuperar la toponimia tradicional, faciendo ésta oficial en sustitución de la castellana. Sicasí, nun sería hasta mayu del 2005 cuando daría aniciu’l procesu cola aprobación de los espedientes d’El Franco, Carreño y Llanes.

Semeya obra d'Armando Álvarez.