El topónimu Eilao yá ye l'únicu oficial

|
Mapa parroquial d'Eilao

La espublización nel BOPA del decretu toponímicu d’Eilao convierte los nomes de llugar tradicional del conceyu nos únicos oficiales, derogando los castellanos. D’esta forma Eilao ye la única forma válida pa referise a la capital del conceyu en cuenta de ‘Illano’.

Tres la aprobación en Conseyu de Gobiernu’l xueves pasáu del espediente, namái quedaba la so presencia nel BOPA pa qu’estos topónimos entraran en vigor en sustitución de los hasta agora oficiales, formes castellanizaes. Asina, les cinco parroquies del conceyu ven camudaos el so nome: Buyaso (que sustitúi a ‘Bullaso’), Xío (‘Gío), Eirías (‘Herías’), Eilao (‘Illano’) y A Ronda (‘Ronda’).

Tamién hai cambios en nomes de pueblos, aldees o barrios, como ye’l casu de Bustello (‘Bustelo’), Rudicova (‘Riodecoba’), Zadamoño (‘Cedemonio’), Santesteba (‘San Esteban’) y Silvareye (‘Silvarelle’), ente otros munchos. D’igual forma, l’espediente aprobáu recueye topónimos non rexistraos hasta la fecha, como A Chousaveya, Xanxuyán, Os Navalóis o Meisnado.

12 conceyos pendientes

Eilao ye’l conceyu númberu 66 en recuperar la so toponimia tradicional, mentes que los 12 restantes hasta llegar a completar los 78 del país yá tienen abiertu’l procesu. Tán nuna fase avanzada Cabrales, Llanera, Castropol y Somiedu, con Cuideiru, Ayande, Caravia, Ibias, El Valle Baḥu de Peñamellera, Salas, Navia y Pravia en fases diferentes del mesmu.

Mapa fechu por Sergio Buelga baxo llicencia CC BY-SA 3.0.

AdxuntuTamañu
PDF icon BOPA toponimia Eilao297.12 KB
Contador Estadistiques