La intención d’IX ye que’l dictame de la comisión sobre l'asturianu tea pa enantes de que termine l'añu

|
La intención d’IX ye que’l dictame de la comisión sobre l'asturianu tea pa enantes de que termine l'añu

Esti vienres va celebrase la reunión de la Comisión Especial d’Estudiu sobre'l Réxime de Proteición y Promoción del Asturianu nel que se va alcordar el calendariu de trabayu sobre’l borrador de dictame presentáu por IX. Concha Masa, la so presidenta, quier tenelu enantes de fin d’añu, “pero nun sé si será posible”.

La sala Xovellanos de la Xunta Xeneral va acoyer la sesión de la comisión a les 10 hores, momentu nel que los representantes de los grupos parllamentarios van consensuar el calendariu de trabayu y los plazos pa la presentación de modificaciones pal documentu final que va votase darréu en Plenu. “Espero que tol mundu quiera participar coles sos alegaciones y coles sos propuestes”, señala Masa.

La presidenta de la comisión cuenta con tener el dictame “pa enantes de final d’añu, pero nun sé si será posible. Depende de les reaciones de los demás grupos”, esplica. Por ello, hasta 2018 ye seguro que’l documentu nun se llevará a Plenu.

Sobre’l borrador, Masa señala que “propón munches cuestiones que tán inclusive na Llei d’Usu y que se podríen poner en marcha d’una forma más activa. La Llei d’Usu da bastante flexibilidá pa entamar midíes qu’hasta agora foron mínimes. Perhí entovía hai munchu trabayu por facer. De cualquier manera, la cooficialidá declárase equí como la una única garantía de pervivencia del asturianu”.

Na semeya, Masa preside una sesión de la comisión.

Contador Estadistiques