“Les postures de los partíos sobre la oficialidá tán mui definíes”, afirma Masa

|
Concha masa comisión

Les comparecencies informatives de la Comisión Especial d’Estudiu sobre'l Réxime de Proteición y Promoción del Asturianu de la Xunta Xeneral finaron y IX trabaya na redaición d’un informe sobre les mesmes. “Toles opiniones coincidieron nun 100 por cien”, apunta la so presidenta Concha Masa, que ve complicao cambios de postura sobre la oficialidá al tar les sos posiciones "mui definíes".

Foron seis les sesiones celebraes nes que dieron la so opinión sobre la situación del idioma y respondieron les entrugues de los diputaos Genaro Alonso, Fernando Padilla o Ana María Cano, asina como profesionales de dellos campos como Xuan Bello, Francisco José Llera Ramo, Carles Martí, Pilar Rubiera, Ramón d’Andrés, David Rivas o José Alba, ente otros munchos. “Toles opiniones coincidieron nun 100 por cien na mesma llinia: la defensa de los derechos de los asturfalantes, la defensa de la llingua como parte del nuesu patrimoniu y la necesidá de la oficialidá”, resume Masa, qu’afonda en qu’ésta “nun sería suficiente ensin dar pasos alantre na normalización”.

D’igual forma, la presidenta de la comisión del asturianu quixo calcar nos “munchos problemes y paradoxes que pudimos conocer de boca de los comparecientes énte la falta d’oficialidá”. Entrugada si cree qu’estes declaraciones podríen motivar un cambiu de los partíos na so postura col idioma, Masa apuntó que “ye difícil qu’haya modificaciones. Les postures de los partíos sobre la oficialidá tán mui definíes”.

Sicasí, sí espera qu’haya consensu p’aprobar el documentu final nel que yá ta trabayando Izquierda Xunida (IX), asina como voluntá de negociación por parte de toles formaciones. Entovía nun hai plazos marcaos pa la so presentación, que podría allargase per meses dada la cercanía del branu y l’alta actividá de la Cámara.

Contador Estadistiques