El PP presenta un recursu al TSXA contra’l plan pa facer l’asturianu vehicular en Primaria esti cursu

|
David González Medina

El Tribunal Superior de Xusticia d’Asturies (TSXA) almitió a trámite’l recursu que presentó’l PP al Plan Pilotu esperimental de Promoción del Usu del Asturianu, qu’echa a andar esti cursu en cuartu de Primaria. Alega que supón meter la oficialidá pela puerta d’atrás.

David González Medina, voceru d’Educación del Partido Popular (PP), anunció esta mañana esti pasu nuna rueda de prensa na qu’afirmó que’l conseyeru Genaro Alonso “sabe y ye consciente de que’l conteníu d’esti plan pilotu nun se pue facer, nun s’axusta a llei vixente nin a la formativa, yá que la LOMCE diz que n’España se pueden utilizar como llingua vehicular el castellanu, les llingües cooficiales y les estranxeres, y amás diz que nes comunidaes onde esista una llingua non cooficial, pero sí protexida, esto ye, l’asturianu, podrá ufiertase nel bloque de llibre configuración, dalgo que se yá se produz n’Asturies, porque l’asturiano ufiértase en toles etapes educatives”. Asina, apuntó que pa poder facer la llingua asturiana vehicular ésta debería ser oficial.

“Ye un intentu cobarde de Javier Fernández y el so Gobierno de introducir l’alderique de la cooficialidá ‘de tapadillo’, porque ye un debate que se debería dar nel Parllamentu, pero s’intenta colar nesti plan”, sigue González Medina, que censuró la falta de diálogu del Executivu: “Utilizamos tolos calces parllamentarios pa insistir en que’l plan nun s’axusta a la llegalidá, y non atopamos capacidá d’alderique, sinón soberbia y aneciamientu, y foi’l propiu Javier Fernández el que nos animó a dir a los tribunales”.

Por último, el popular aseguró que “el PP diz sí al asturianu na escuela, como optativa pa que la escueyan de manera llibre les families, pero dientro la llegalidá”.

Iniciativa pol Asturianu fala de “actitú radical y antidemocrática”

Tres conocer esti pasu dau pol PP, Iniciativa pol Asturianu emitió un comunicáu nel que reclama a los populares a que dean “exemplu de la so petición continuada de más llibertá d'elección pa les families nel sistema educativu, retirando la demanda”. “Hai que recorda-y al PP d'Asturies qu'esti plan, que pa Iniciativa pol Asturianu ye dafechu insuficiente n'hores y conteníos, tien l'absoluta garantía de llibertá, tanto pal alumnáu y les families, como pal profesoráu y los centros, que s'apunten, toos ellos de forma voluntaria a participar nel mesmu”, recuerden.

Asina, el coleutivu entruga al PP “si lo que quier ye que l'asturianu desapaeza nes próximes xeneraciones. Si ye asina, sedría coherente esta postura. Sicasí, el PP diz defender la protección del asturianu, polo que nun s'entiende la so postura contraria a les midíes que favorecen esi oxetivu”. Por último, apunta que la posición de la presidenta Mercedes Fernández “nun respuende a les opiniones que mos lleguen de les bases del PP y d'otros munchos dirixentes del partíu, que nun entienden estes posiciones agresives contra l'asturianu, que namás lleven al PP a una postura marxinal y antidemocrática”.

Contador Estadistiques