L’ALLA diz tar perplexa “pol asitiamientu antiasturianu del PP”

El recursu presentáu nel TSXA pol PP al Plan Pilotu esperimental de Promoción del Usu del Asturianu provocó la reaición de l’ALLA, que nun comunicáu “amuesa la so perplexidá énte esta iniciativa”. Pide a los populares qu’abandonen el so “asitiamientu antiasturianu”.

“Pela cueta, hai que conseñar que nun son pocos los militantes y simpatizantes del PP qu’apocayá vienen tresmitiendo a la institución llingüística que nun entienden l’oxetivu d’una estratexa que nun comparten y que, a la escontra, ellos sí que tienen en cuenta el valir social y cultural de la nuesa llingua”, apunten de l’Academia de la Llingua Asturiana (ALLA), institución que nun acaba d’entender “que daquién piense que ye rentable políticamente emplegar de contino’l despreciu y la negación de les posibilidaes de la llingua y la cultura asturiana, intentando facer d’ello un elementu de confrontación n’Asturies, mui en particular nel ámbitu educativu, na Xunta Xeneral o na vida diaria de los conceyos”. Asina, fai referencia a los datos del avance de la III Encuesta Sociollingüística d’Asturies, que “quiciabes los dirixentes del PP d’Asturies nun tienen interés en conocer”.

Por ello, solicita al PP, “y mui en particular a los sos principales dirixentes, que reconsideren tal estratexa de crispación y falsos discutinios”. Ye importante destacar que l’ALLA solicitó hai casi un mes una aconceyamientu a Mercedes Fernández, presidenta popular, “pa poder falar xuiciosamente de toes estes cuestiones y de delles otres que cinquen a la cultura d’Asturies, ensin qu’hasta’l momentu hubiere rempuesta dala a tal solicitú”.

Esviamientu de casos de corrupción

La Xunta pola Defensa de la Llingua Asturiana (XDLA) tamién emitió una nota, mui crítica, por esti mesmu asuntu. Nella acusa al PP de tar históricamente “contra de los derechos individuales de les persones” y d’usar al asturianu pa “esconder mediáticamente los casos de corrupción que chisquen a la formación”.

La organización cívica recuerda que’l plan pilotu va entamase “de forma voluntaria en seis centros, namás una hora a la selmana y que va tener que cuntar col preste del equipu directivu del centru y de los pas y mas del alumnáu. Sicasí, el PP nun quier equí n'Asturies esa llibre elección que tanto defende n'otros territorios y qu'usa nes demás comunidaes autónomes con llingua propia p'atacar la diversidá llingüística del Estáu”.

“Dende la XDLA invitamos al PP asturianu a que se sume a esi cambiu, a dexar de llau idees propies d'otros tiempos y apoye la igualdá, que nel casu d'Asturies implica respetar l'usu de la llingua asturiana nel sistema educativu. Quién sabe, igual dalgún día Cherines fai igual que la so homóloga madrilana y vémosla blincando nel Conciertu pola Oficialidá”, espresa’l coleutivu en referencia a la presencia de Cristina Cifuentes, presidenta de la Comunidad de Madrid y del PP madrilanu, nos actos del Arguyu Gai diez años depués de que’l PP llevara a los tribunales la llei del matrimoniu igualitariu.