"El so recursu prueba l'odiu yá atávicu del PP", asegura Alonso

El conseyeru d'Educación y Cultura opinó sobre'l pasu dau polos populares pa llevar al TSXA'l plan pilotu pa facer vehicular l'asturianu en Primaria'l cursu viniente.

Nuna intervención énte los medios de comunicación, Genaro Alonso señaló que'l recursu énte'l Tribunal Superior de Xusticia d'Asturies (TSXA) por esti plan "prueba l'odiu yá atávicu del Partido Popular, y en particular del diputáu González, contra l'asturianu". D'igual forma, criticó la postura paradóxica de los populares, "que d'una parte invoquen cuando-yos convién la llibertá, llibertá d'eleición de centru, y per otra parte quieran tarazar una llibertá a la eleición de la llingua asturiana que ye un derechu llingüísticu que naide pue tarazar nel marcu que tenemos", en referencia a la Llei de Promoción y Usu del Bable/Asturianu.

"¿Cuál ye'l problema?", entrúgase Alonso cuando calca na voluntariedá del Plan Pilotu esperimental de Promoción del Usu del Asturianu. "Ye dalgo pa min dificílmente comprensible sin nun ye, repito, por eso prexuicios que'l Partido Popular exhibe con frecuencia contra una llingua milenaria que ye una seña d'indentidá d'Asturies, como lo ye'l gallegu en Galicia, al que defenden, o al valencià en València, al que tamién defenden. Esa incoherencia ye la que yo nun acabo d'entender".