Carlos Cuesta califica de "aldeanismo" la defensa del asturianu

Convidáu pol PP alerta sobre un "virus", la cooficialidá, qu'entama en Galicia.

El periodísta d'Okdiario, nacíu en Xixón en 1971, y conocíu poles sos posiciones polémiques y estremistes dientro del panorama mediáticu de la derecha nacionalista foi escoyíu como 'moderador' na mesa redonda na que'l PP va a argumentar contra la reconocencia de los derechos llingüísticos. El polémicu periodista nun tien una posición ambigua sobre'l movimientu de reivindicación llingüística.

Cuesta, nel programa La Tarde de Dieter, de la canal Esradio, comentaba'l pasáu mes de payares que'l movimientu de defensa del asturianu "busca el paletismo y el aldeanismo". Según el periodista d'Okdiario, alredor del asturianu hai un "maná de subvenciones" y ta creándose "un gran negociu nel que salen alimentaes un montón d'asociaciones, politicuchos y aspirantes a politicuchos".

Na so intervención Cuesta emponderó al Club de los Viernes y al so alter-ego la Plataforma contra la Cooficialidad por oponese n'Asturies a los derechos llingüísticos y alertó sobre'l "virus" d'un proyectu qu'entama en Galicia, y que se pretende "que pase a Asturies y vaya xuntándose al separatismu-nacionalismu vascu".