El númberu 38 de la revista ‘Asturies’ de la Fundación Belenos yá ta na cai

|
El númberu 38 de la revista ‘Asturies’ de la Fundación Belenos yá ta na cai

Siete trabayos, amás de les estayes habituales, conformen el númberu 38 de la revista ‘Asturies, memoria encesa d’un país’ de la Fundación Belenos, que tres comenzar col so repartu nel Seminariu d’Estudios Asturianos, yá ta disponible en llibreríes. El vienres va presentase en Villaviciosa con un actu na Casa de los Hevia.

L’etnógrafu, y tamién miembru de la Fundación Belenos, Inaciu Hevia Llavona va protagonizar l’actu al ser convidáu p’afondar nel so estudiu espublizáu nesti númberu ‘L’arte de la tonelería pa sidra n’Asturies’, que tanta tradición tien nel conceyu maliayu. La Casa de los Hevia va ser la sede de la so intervención y presentación de la revista, con comienzu previstu a les 19 hores con entrada llibre hasta completar aforu.

El 38 de ‘Asturies, memoria encesa d’un país’ complétase colos trabayos ‘Reptiles n’Asturies: llargatos y llargatexes, eslizones y alagüezos’, de Fernando Montes; ‘La Cerrosa (Suarías, Valle Baḥu de Peñamellera), una torca de la Edá del Fierro’, d’Alis Serna y Alfonso Fanjul; ‘Ciudadanos asturianos escontra Napoléon’, d’Evaristo C. Martínez-Radío; ‘Un elementu decorativu propiu del conceyu de Nava: la ‘cenefa de picos’ nel corredor de la casa tradicional, de Daniel Cueli; y ‘Construyendo una historia xenética de la población asturiana’, d’Antonio F. Pardiñas y Belén López Martínez. Tamién espublízase ‘Fueu nos cuernos: batalles mítiques na memoria oral d’Asturies’ d’Alberto Álvarez Peña y Cristobo de Milo Carrín, un artículu perinteresante del que se pudo conocer parte del so conteníu na charra d’Ástura del mes d’ochobre protagonizada por Álvarez Peña baxo’l nome 'Al rodiu Cuadonga: batalles mítiques na tradicional oral asturiana. Territoriu ya identidá'.

Completen el númberu les estayes fixes como ‘Memoria Gráfica d’Asturies’, nesta ocasión dedicada al pueblu de Chanuces (Quirós), ‘L’Estoxu’ y ‘Cartafueyos de Belenos’. La revista yá ta disponible nes llibreríes habituales tres comenzar col so repartu en La Puela coincidiendo col XIX Seminarios d’Estudios Asturianos que reunió a unes 70 persones el mes pasáu y tuvo como temática ‘Al otru llau de la mar. Asturies y les rellaciones atlántiques na dómina antigua’.

Contador Estadistiques