“Tamos aportando’l nuesu granín d’arena cola divulgación d'actividaes asturianistes”, apunten dende Ástura

|
Amadéu Benavente y Alberto Álvarez Peña charra Ástura Cuadonga

La visión de Cuadonga dende la tradición esplicada por Alberto Álvarez Peña abrió la sesta temporada de les charres mensuales de cultura asturiana d'Ástura nel Atenéu Obreru de Xixón. “Tamos aportando’l nuesu granín d’arena cola divulgación d'actividaes asturianistes”, afirma’l so vicepresidente Rogelio Álvarez Hevia.

“Pretendemos abarcar tolo rellacionao cola investigación sobre la historia, la cultura… Hasta entamemos una conferencia sobre les investigaciones sobre’l cáncer del equipu d’Otín n’asturianu”, recuerda. Temátiques que, en munches ocasiones, “nun tienen presencia n’otros ámbitos y nos medios de comunicación”, añade Álvarez Hevia.

Asina, Ástura pretende ofrecer actividaes asturianistes a la ciudadanía. “A nivel d’asistencia tamos bastante contentos. Hai conferencies qu’atraen más xente y otres menos, pero siempre hai públicu interesao nelles”, apunta.

La primera d’esti cursu nuevu tuvo llugar ayeri y llevaba’l nome de 'Al rodiu Cuadonga: batalles mítiques na tradicional oral asturiana. Territoriu ya identidá'. Asina esplica que “la nuesa intención ye dar una visión de Cuadonga y el Reinu d’Asturies dende la tradición. Dar una visión distinta a la que se ta dando, esto ye, contar les coses como les cuenta la tradición, non como la xente cree que son”.

Troncada en Cuadonga

L’investigador Alberto Álvarez Peña foi’l convidáu por Ástura pa desendolcar esta temática, pa lo que basó la charra nun artículu que ta preparando en comuña pal númberu próximu de la revista ‘Asturies. Memoria encesa d’un país’ de la Fundación Belenos. Na mesma rellató cómo los habitantes de los conceyos de la zona cercana a Cuadonga coinciden en resumir la batalla liderada por Pelayo como una troncada: una suelta de troncos lladera abaxo tres preparar una trampa a los moros.

Tamién contó lleendes similares presentes en Gales y Éire y rellató otres munches batelles lideraes, según la tradición, por Pelayo y la so marca dexada na toponimia, como les de Ḷḷanos de Rozamariel (Cangas del Narcea), Cinfuegos (Quirós) o’l Camín Real de la Mesa (Grau, Balmonte y Somiedu), ente otres, “qu’afiancen la identidá asturiana y la territorialidá” al tener un carauter llendador. “Na lleenda tradicional nun apaez lo que depués s’ellaboró –en referencia a la Reconquista–. Eso ye muncho más posterior” aseguró Álvarez Peña.

Na semeya, Amadéu Benavente, presentador del actu, y Álvarez Peña.

Contador Estadistiques