El XIX Seminariu d'Estudios Asturianos mira hacia la mar

|
Cartelu XIX Seminariu d'Estudios Asturianos

'Al otru llau de la mar. Asturies y les rellaciones atlántiques na dómina antigua' ye'l títulu de les xornaes qu'entama en La Puela la Fundación Belenos el sábadu y domingu.

El sábadu van comenzar les ponencies del XIX Seminariu d'Estudios Asturianos coles intervenciones, n’horariu de mañana, de Jorge Camino ('Les conexones atlántiques na Prehistoria recién d’Asturies'), Fernando Alonso Romero ('Les embarcaciones y navegaciones nel mundu celta de la Edá Antigua a l’Alta Edá Media') y Iván Muñiz López y Alejandro García Álvarez ('El Castiellu de Gauzón. Una fortaleza medieval nel comerciu del Arcu Atlánticu'). Yá de tarde, Cristobo de Milio Carrín va falar sobre 'Motivos celtes nel folklor asturianu: otra preba del venceyu atlánticu' y Iván Huerga de 'Celtes de nenyuri y perdayuri. Un resume de la teoría atlantista y del estáu actual de la cuestión'.

El tradicional filandón, fiesta asturiana de nueche con música del país nel Café Centro, va zarrar la primer xornada. Yá de domingu va facese la proyeición d’un audiovisual y, darréu, un conceyu abiertu cola participación de dellos ponentes y miembros de la Fundación Belenos nun alderique col que se va pesllar un seminariu que cuenta cola collaboración de la Conseyería d’Educación y Cultura, l’Ayuntamientu d’Allande, la Caxa Rural d’Asturies y La Nueva Allandesa.

El preciu de la matrícula ye de 35 euros, cola posibilidá d’agospiase en La Nueva Allandesa en réxime de pensión completa –dende la xinta’l sábadu a la xinta’l domingu, too incluyío dafechu– por 100 euros por persona. P’apuntase o algamar más información pue contautase cola Fundación Belenos nos teléfonos 985.24.48.11 y 680.114.090 o nel corréu electrónicu seminariubelenos@gmail.com, con plazu hasta güei.

Contador Estadistiques