El ministeriu frena la vía aragonesa pa crear la especialidá docente

La “Orden del Consejero de Educación, Cultura y Deporte por la que se establece la especialidá docente de lengua aragonesa” queda frenada pola postura del Ministeriu d’Educación y Formación Profesional. El departamentu de Pilar Alegría caltién que namái la modificación del Real Decretu d’Especialidaes en Madrid pue llevar a la creación de la especialidá docente, pa lo que ye necesario la oficialidá.

Ésta ye la mesma posición que vien treslladando al Gobiernu d’Asturies nos últimos aconceyamientos y consultes feches pola Conseyera d’Educación, Lydia Espina, énte’l pidimientu de crear la especialidá docente de Llingua Asturiana y Gallego-asturiano n’Asturies. Una vía que dalgunos espertos consideren posible, pero que niega’l ministeriu apuntando que la única forma válida ye la incorporación de la oficialidá nel Estatutu d’Autonomía.

La edición impresa de güei del ‘Heraldo de Aragón’ informa de la negativa recibida pol Executivu aragonés. La so intención yera que funcionarios del cuerpu de maestros y de los cuerpos de caderalgos y profesores de Secundaria y de les escueles oficiales d’idiomes pudieren dar clase de Lengua Aragonesa y Literatura llueu de pasar un procesu seleutivu, una vía adaptada a la situación educativa actual d'esti territoriu.

Según esplica’l periódicu, anguaño n’Aragón hai 21 docentes que dan la materia, 18 n’Infantil y Primaria y 3 en Secundaria, toos ellos interinos. El nun contar con especialidá docente, como asocede n’Asturies, onde’l númberu de maestros y maestres que ponen Llingua Asturiana o Gallego-asturiano algama los 300, impide qu'estos profesionales puedan presentase a oposiciones, facer un concursu de tresllaos o estabilizase y contar colos mesmos derechos que’l restu de profesores.

Na imaxe, la ministra Alegría xunto col presidente d'Asturies, Adrián Barbón, na so visita al país pa participar na inauguración de la LXV Feria Internacional de Muestres d'Asturies (FIDMA). Semeya obra d'Armando Álvarez.