Podemos insiste en comisión cola especialidá docente d’asturianu: “hai qu’esplorar toles posibilidaes”

La creación de la especialidá docente de Llingua Asturiana y Gallego-asturiano tornó a tratase na Comisión d’Educación. Nuria Rodríguez, diputada de Podemos, insistió en que “hai qu’esplorar toles posibilidaes” y la conseyera Lydia Espina calcó nel so enfotu nel tema a la espera de la respuesta del Conseyu Consultivu sobre la vía aragonesa.

La entruga foi “qué valoración fai la so conseyería de les posibilidaes pa la creación de la especialidá d’asturianu y d’a fala eonaviega que citen los caderalgos Xavier Arzoz y José Manuel Pérez nel so informe al respeutu de la oficialidá de les llingües propies asturianes”, la mesma que llevó Podemos al Plenu anterior al celebráu esta selmana, el día 14. Espina retrucó que “poco más puedo dici-y sacante que revisé la sentencia 56/2016 del Tribunal Constitucional que vusté mesma me recomendó naquella sesión, una sentencia venceyada a Aragón”, y caltuvo que “el ministeriu a tou respondiónos con una negativa, incluyíes les opciones que menciona l’informe”.

Rodríguez López, qu’emplegó l’asturianu na so intervención, agradeció a la conseyera que fixera los deberes y rescampló que dicha sentencia ye “un exemplu mui pareyu al que tamos viviendo equí n’Asturies” y apunta que “ye posible la creación de la especialidá que-y demandamos”. Ésta desestima’l recursu d’inconstitucionalidá contra dellos artículos de la 'Ley de Cortes de Aragón 3/2013, de 9 de mayo, de Uso, Protección y Promoción de las Lenguas y Modalidades Lingüística Propias de Aragón' presentada polos grupos parllamentarios del Congresu del PSOE; IU, ICV-EUIA, CHA: La Izquierda Plural; Convergència i Unió; y mestu.

“Esti informe encargáu pol Principáu d’Asturies ye bastante claru con respeuto a qué instrumentos tenemos pa poder crear esta especialidá de llingües propies”, afirmó la diputada, que reclamó “un poco más de voluntá política” y “esplorar toles posibilidaes”. Asina, llueu de tener constancia de que la conseyera revisó la sentencia del Consitucional, entrugó a Espina “cuáles van ser los siguiente pasos de la conseyería pa facer realidá una reivindicación absolutamente llexítima del profesoráu pa que puedan tener esta especialidá, entamu pa la estabilización del profesoráu”.

"Les puertes tán pesllaes"

“Comparto con vusté la reflexó que fai. Entiendo perfeutamente que ye necesario buscar una alternativa más pa los 250 maestros y maestres d’asturianu que nun pueden anguaño participar n’oposiciones, facer un concursu de tresllaos o estabilizase y desfrutar de los mesmos derechos que’l restu de los sos compañeros y compañeres”, principió la maliaya, que repitió que les dos propuestes del ‘Estudiu sobre'l marcu afayadizu pa la planificación y desarrollu de la normalización del usu de la llingua asturiana y el gallego-asturianu nel ámbitu del Principáu d'Asturies’, coordináu por Miguel Ángel Presno, siempre tuvieron la mesma respuesta nel Ministeriu d’Educación y Formación Profesional: “les puertes tán pesllaes; ye inviable esta posibilidá”.

Darréu repitió les argumentaciones de Madrid que yá treslladara nel Plenu. “Tamos a la espera de ver lo que nos diz el Conseyu Consultivu, pero garantizo-y qu’ente cualquier indiciu d’una oportunidá, sía la que fore, esta conseyería y yo mesma siguiremos intentando solucionar esti problema”.

Na semeya, Rodríguez López.