Aragón saca a información pública una orde pa establecer una especialidá docente de llingua aragonesa

El xueves salió a información pública la “Orden del Consejero de Educación, Cultura y Deporte por la que se establece la especialidá docente de lengua aragonesa”. A les places podría acceder namái personal funcionariu llueu de pasar un procesu seleutivu.

Esta propuesta del Gobiernu aragonés, socialista al igual que l’asturianu, va regular la forma d’acceder al puestu de profesor de llingua aragonesa, idioma que tampoco nun tien el calter d'oficial. Los aspirantes, qu’han ser personal funcionariu del cuerpu de maestros y de los cuerpos de caderalgos y profesores de Secundaria y de les escueles oficiales d’idiomes, habríen de pasar un procesu seleutivu correspondiente pa dar clase d'aragonés.

Aragón da, poro, esti pasu pa crear la especialidá per vía autonómica que s'adapta a la so situación educativa actual.

Refugu dende'l ministeriu

N'Asturies ta intentándose que la creación la especialidá docente del asturianu y el gallego-asturiano sía establecida pol Ministeriu d'Educación al traviés de la modificación del Real Decretu d’Especialidaes pa que los aspirantes a la plaza de maestru puedan opositar a esta especialidá, ensin avances pola negativa a dar esti pasu alministrativu col argumentu de nun ser una llingua oficial.

Esta opción ye la defendida pola Academia de la Llingua Asturiana (ALLA) como única posible, institución que considera que'l fechu de que l'idioma nun sía oficial nun torga que se pueda facer dicha modificación. Otra manera, hai espertos que consideren que tamién se podría desendolcar la creación de la especialidá per vía autonómica.

Na semeya, el conseyeru aragonés d'Educación, Cultura y Deporte, Felipe Faci, con alumnos d'una escuela.

NOTICIA EDITADA