'El llibru póstumu de Sherezade', meyor llibru del 2017 pa la Malory

|

La tertulia entreguina decidióse por esti poemariu de Raquel F. Menéndez.

La selmana pasada, mientres un actu entamáu pola Terturlia Mallory, un xuráu compuestu polos escritores Xulio Arbesú, José Luis Rendueles, Pablo Rodríguez Medina, Solinca Turbón, David Fernán, Roberto Corte, Chechu García y Henrique G. Facuriella fallaron el premiu que dende hai siete años concede al meyor llibru en llingua asturiana editada nel añu anterior. El gallardonáu esti añu ye'l 'Llibru póstumu de Sherezade', primer poemariu de l'autora de Vallouta y ganador tamién del Nené Losada Rico del 2016, "una elexía en forma de diálogu imposible con so güela, la muyer que cuidó d'ella de pequeña, que-y aprendió a ver el mundu, y que, al final de la vida, alcuéntrase ensin memoria por culpa del Alzheimer", espliquen dende la Malory.

L'acta del xuráu destaca "l'autenticidá de la voz poética y la verdá de les emociones que l’autora espeya en caún de los poemes, unes emociones que tienen como puntu de partida les rellaciones ente les trés protagonistes femenines del llibru: la propia poeta, la güela con Alzheimer y la madre. L’autora muéstrase heriede de un llinaxe femenín que se materializa nel conocimientu que vien al traviés de los oxetos probes –botones, alpargates, el café de pota…– pero, sobre too, de los cuentos, como aquellos colos que la Sherezade de 'Les mil y una nueches' va consiguiendo ganar un día más de vida". 

D'esta forma l'autora moza incorpórase al palmarés d'esti gallardón xunto con otros destacaos nomes de la lliteratura asturiana: Xabiero Cayarga, con ‘La neve del cuquiellu’ (2011); Ruma Barbero, con ‘La Chelita’ (2012); Milio Rodríguez Cueto, con ‘Carne de melandru’ (2013); Consuelo Vega, con 'Más espeso que l'agua' (2014); y Ángeles Carbajal, con 'L'aire ente la rama' (2015); y Francisco 'Paco' Álvarez, con 'Lluvia d'agostu' (2016). Con esti gallardón los sos entamadores quieren prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n'asturianu.

La recompensa que va recibir Menéndez va ser una ilustración d'Alfonso Zapico y una medaya conmemorativa, que se van entregar nun actu públicu en L'Entregu en feches próximes. 

Contador Estadistiques