'Incorrectos', meyor obra n'asturianu del 2018 pa la Tertulia Malory

|
Cubierta 'Incorrectos' de David Artime

El so autor ye'l periodista David Artime.

Los escritores Xulio Arbesú, José Luis Rendueles, Solinca Turbón, David Fernán, Roberto Corte, Aique Fernandi, Chechu García y Henrique G. Facuriella, aconceyaos nel pub Tom Malory de L’Entregu, formaron el xuráu encargáu de decidir la obra merecedora de llevar el premiu de la Tertulia Malory al meyor llibru n'asturianu del añu anterior. Nesta ocasión el fallu foi por mayoría por mor de la alta producción lliteraria de calidá nel 2018, como bien apuntaron los sos miembros, decidiéndose por 'Incorrectos'.

L'acta del premiu destaca d'esta novela del autor candasín "l’arquitectura narrativa, el ritmu y la fondura psicolóxica de caún de los personaxes protagonistes d’una obra que va muncho más p’allá de la premisa argumental, al poner al llector énte un espeyu qu’enseña los demonios de la sociedá d’anguaño con un realismu grande". Como reconocimientu, Artime va recibir próximamente una ilustración d'Alfonso Zapico y una medaya conmemorativa.

Editada por Saltadera, 'Incorrectos' tien como fondu el "procesu de reinserción de presos d’ETA y de la violencia na cai de grupos radicales". La obra "quier ser un berríu contra la dictadura de lo políticamente correcto al traviés de la historia d’Aníbal, un neonazi violentu y bien conocíu nos ambientes de la estrema derecha madrileña, y Maitane, una militante d’ETA implicada en dos asesinatos. Xuntos entamen a percorrer un camín peligrosu a la busca d’un porvenir dignu: atrás, el so pasáu; delantre, un futuru inciertu. Pero’l que sal de los cánones yá sabe lo que-y queda: la esclusión y el linchamientu".

Octava edición

La Tertulia Malory, nacida nel n'ochobre del 1998 a partir d'un grupu d'escritores que s'axuntó nos talleres lliterarios que punxo'l profesor Benigno Delmiro na biblioteca de L’Entregu col oxetivu de falar y aldericar sobre llibros y lliteratura, entreguen dende'l 2012 esti premiu col que pretenden "prestixar les llestres asturianes" y, al empar, dar difusión a les obres más destacaes. Nestos años llevaron el gallardón Xabiero Cayarga, con ‘La neve del cuquiellu’ (2011); Ruma Barbero, con ‘La Chelita’ (2012); Milio Rodríguez Cueto, con ‘Carne de melandru’ (2013); Consuelo Vega, con 'Más espeso que l'agua' (2014); y Ángeles Carbajal, con 'L'aire ente la rama' (2015); Francisco 'Paco' Álvarez, con 'Lluvia d'agostu' (2016); y Raquel F. Menéndez, con 'El llibru póstumu de Sherezade'.

Contador Estadistiques