'Lluvia d'agostu', meyor llibru del 2016 pa la Tertulia Malory

|

La novela del periodista xixonés Francisco 'Paco' Álvarez sigue sumando ésitos.

La Tertulia Malory vien aconceyando dende hai casi 20 años nel pub Tom Malory de L'Entregu y, dende hai cinco premia al meyor llibru n'asturianu del añu anterior. Asina, los sos integrantes pretenden "prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n’asturianu".

El xuráu d'esti añu, compuestu polos escritores Xulio Arbesú, José Luis Rendueles, Pablo Rodríguez Medina, Solinca Turbón, David Fernán, Roberto Corte, Chechu García, Lluis Aique Iglesias y Henrique G. Facuriella, decidiéronse pola obra 'Lluvia d'agostu', d'Álvarez, ganadora tamién del XXXVI Premiu Xosefa Xovellanos de novela. Los motivos que llevaron a fallar por esti llibru son «la maestría cola que l’autor resuelve una empresa tan ambiciosa como la de contar la historia del anarquista Buenaventura Durruti ensin perder de vista al home que la historia convirtiera nun símbolu. Tres d’esti trabayu narrativu, onde Álvarez fai rescamplar el so dominiu del asturianu pa facer llegar al públicu la historia al traviés d’un llinguaxe contemporaneu, apréciase un llabor de documentación rigorosu, que mete dafechu al llector na trama y lu conecta colos sos protagonistes».

La recompensa del gallardón ye una ilustración d’Alfonso Zapico y una medaya conmemorativa, que se van entregar nun actu públicu en L’Entregu na seronda d’esti mesmu añu. Los ganadores n'años anteriores foron Xabiero Cayarga, con ‘La neve del cuquiellu’ (2011); Ruma Barbero, con ‘La Chelita’ (2012); Milio Rodríguez Cueto, con ‘Carne de melandru’ (2013); Consuelo Vega, con 'Más espeso que l'agua' (2014); y Ángeles Carbajal, con 'L'aire ente la rama' (2015).

Contador Estadistiques