El IX Premiu María Xosefa Canellada, pa ‘La mar’ d'Adolfo Camilo

|
Adolfo Camilo Díaz

La obra ‘La mar’, que trata la realidá de la emigración africana, foi merecedora del IX Premiu María Xosefa Canellada de lliteratura infantil y xuvenil. El so autor ye Adolfo Camilo Díaz, que previamente ganara cuatro Xosefa Xovelanos de narrativa.

El vienres tuvo llugar na Casa la Cultura de Santolaya la reunión del xuráu del gallardón correspondiente a los Premios Lliterarios qu’entrega la Conseyería d’Educación y Cultural, presidíu como ye vezu pol direutor xeneral de Planificación Llingüística, Fernando Padilla, y formáu por especialistes en lliteratura infantil y xuvenil como Lourdes Álvarez García, Paz Fonticiella y Vicente Gracía Oliva –ganador del añu pasáu con ‘Fontenebrosa III: el final’–, l’alcalde de Cabranes Gerardo Fabián y Alonso Zamora, fíu de la escritora que da nome al premiu. Por mayoría, decidieron conceder el María Xosefa Canellada a ‘La mar’, destacando “l’abordaxe d’un tema social d’actualidá, la emigración africana, presentada al traviés del protagonista, un adolescente que narra tal que si fuera un viaxe iniciáticu hacia la mar, real y metafórica”.

Al abrir la plica, presentada baxo’l nomatu de ‘Bahir’, el ganador resultó ser l’escritor, home de teatru y xestor cultural Adolfo Camilo, que lleva asina una recompensa de 3.000 euros. El de Caborana suma con ésti cinco gallardones de los convocaos pol Gobiernu, yá que cuenta con cuatro Xosefa Xovellanos de narrativa: ‘Añada pa un güeyu muertu’, correspondiente al añu 1985; ‘Diariu de viaxe’, del 1995; ‘Imago’ –ex aequo con ‘El pisu d’enriba’, de Xulio Arbesú–, del 2006; y ‘Advenimientu’, del 2008.

Contador Estadistiques