El Gobiernu pide disculpes pola actitú de la funcionaria qu’esixó a una ciudadana emplegar el castellanu

|
Logu Gobiernu d'Asturies

El casu de discriminación por emplegar l’asturianu cola Alministración por parte d’una funcionaria de la Conseyería d’Educación y Cultura finó coles disculpes del Gobiernu por esta situación. Reconoz que se vulneró’l derechu de la ciudadana a usar la llingua asturiana qu’afita l'artículu 4.2 de la Llei d'Usu.

La situación diose en setiembre, cuando una muyer al emplegar l’asturianu nuna conversación telefónica recibió la respuesta "por favor, hábleme en castellano". "También yo tengo derecho a pedirte que me hables en castellano", insistió la funcionaria depués de que la ciudadana esplicase’l so derechu en dirixise a ella en llingua asturiana, lo que la llevó a poner el casu en conocimientu d’Iniciativa pol Asturianu, que fixo denuncia pública de la situación y punxo una quexa formal al Gobiernu.

Un mes depués la organización cívica recibió una respuesta dende la Secretaría Xeneral Téunica, que “reconoz que nun se tenía que tener indicao a la ciudadana cambiar de llingua yá que la Llei 1/1998 d’Usu y Promoción del Asturianu, nel so artículu 4.2 dexa claro’l drechu de los ciudadanos a dirixise a l’Alministración del Principáu usando l’asturianu de forma oral como yera nesti casu concretu”, esplica. Por ello, agradez la disculpa y el compromisu col cumplimientu de la Llei d’Usu de la Conseyería d’Educación y Cultura.

“En tou casu, situaciones inaceptables como estes afiten, una vegada más, que la oficialidá de la llingua asturiana ye necesaria. Nun val con dicir que l’asturianu yá ta protexíu cola Llei d’Usu o que yá ye suficiente una norma que s’incumple ensin nengún tipu de problema. Hai que dir más allá y que los drechos llingüísticos de les y los falantes d’asturianu tean reconocíos”, asegura’l so presidente, Inaciu Galán.

Contador Estadistiques