La respuesta d'una funcionaria: "Por favor, hábleme en castellano"

Casu nuevu de discriminación por emplegar l'asturianu cola Alministración.

Una ciudadana púnxose esti mes en contautu cola Conseyería d'Educación y Cultura de manera teléfonica, pa lo qu'usó la llingua asturiana. La reaición al otru llau de la llinia nun se fixo esperar: "Por favor, hábleme en castellano".

Dada la situación, esta persona esplicó-y que taba nel so derechu de dirixise n'asturianu a l'Alministración, a lo que la trabayadora respondió "también yo tengo derecho a pedirte que me hables en castellano". Énte esta actitú grave de la funcionaria, y dada la indefensión esistente, nun duldó en ponese en contautu con Iniciativa pol Asturianu, asociación que ta acabante de poner una quexa formal al Gobiernu na que esixe una disculpa por parte de la trabayadora a la ciudadana y un compromisu por parte de la conseyería pa que nun vueva a dase un episodiu asemeyáu, asina como la puesta en marcha de más mecanismos de formación pa que'l funcionariáu conozca la llexislación vixente y pueda tener un mínimu conocimientu voluntariu d'asturianu.

"Esti casu, una nueva discriminación llingüística, lo que demuestra ye que n'Asturies, como nel restu de territorios d'España, lo que se necesita pa la llingua propia ye la oficialidá", asegura'l presidente del coleutiva, Inaciu Galán. Iniciativa pol Asturianu recuerda amás que la Llei de Promoción y Usu del Bable/Asturianu ampara a la ciudadanía pa dirixise nesti idioma a l'Alministración.