La Conseyería de Servicios y Derechos Sociales obliga a presentar documentación “en lengua castellana”

|
Instrucciones solicitú Conseyería de Servicios y Derechos Sociales obligación castellanu

“Toda documentación deberá presentarse en lengua castellana”, destaca en prieto y mayúscules unes instrucciones pa presentar una solicitú a la Conseyería de Servicios y Derechos Sociales que dirixe Pilar Varela. Iniciativa pol Asturianu denuncia qu’esta esixencia inclumple la Llei d’Usu y Promoción del Bable/Asturianu.

Esta organización yá tien presentada una quexa formal al Gobiernu por una situación más de discriminación na Alministración de los falantes d’asturianu. En concreto torna a vulnerase l’artículu 4 de la Llei d’Usu y Promoción del Bable/Asturianu, que diz nel puntu 1 que “tolos ciudadanos tienen derechu a emplegar el bable/asturianu y a espresase nél, de pallabra y per escritu” y, nel 2, que se “tendrá por válido a tolos efeutos l’usu del bable/asturianu nes comunicaciones orales o escrites de los ciudadanos col Principáu d’Asturies”.

“Polo tanto, cualquier ciudadanu puede presentar documentación n'asturianu. Esi requerimientu ye illegal”, afirma Inaciu Galán, presidente d’Iniciativa pol Asturianu, que recuerda que “va unes selmanes denunciamos qu’una funcionaria reclamó a una ciudadana que nun usare l’asturianu de forma oral nuna comunicación”. Nesi casu, el Gobiernu pidió disculpes y reconoció que se vulneró’l derechu de la ciudadana a usar la llingua asturiana qu’afita’l citáu artículu 4.2 de la Llei d'Usu.

“Solicitamos la retirada inmediata del documentu, la eliminación del requisitu qu’esixe que solo se presente documentación n’asturianu y amás la publicación de formularios en billingüe asturianu/castellán. Si’l tope pal Gobiernu actual no que cinca a la llingua asturia ye la Llei d’Usu, animamos a los sos miembros a que la cumplan de manera real, sinón ye una tomadura de pelo”, esixe’l coleutivu, qu’insiste en que “esti tipu de situaciones evidencien que l’asturianu ye una cuestión tresversal a toles conseyeríes, nun solo afecta a la Conseyería d’Educación y Cultura, y afita una vegada más la necesidá de la oficialidá de la llingua asturiana”.

Contador Estadistiques