El Gobiernu caltién namái en Xixón el nivel d'avisu por contaminación del aire

|
Sínter Arcelor nueche del 28 de febreru del 2019

N'Uviéu'l protocolu baxa a nivel 0, preventivu, y n'Avilés desactívase tres cuatro díes.

Les comisiones de valoración y siguimiento del protocolu d'actuación n'episodios de contaminación del aire alcordaron caltenelu en Xixón al deteutar na estación de l'avenida Arxentina un valor de partícules de diámetru inferior a diez micres (PM 10) de 51 ug/m3. Ye la única de la zona na que se supera'l puntu mínimu d'activación del nivel 1, d'avisu.

Mentes, n'Avilés decidió desactivalu y n'Uviéu pasalu a nivel 0. Según espliquen, los valores rexistraos ayeri nes estaciones de la rede oficial de medición siguiron baxando respeuto a xornades anteriores y los pronósticos de ventilación son favoratibles nes trés zones.

Elena Marañón, direutora xeneral de Prevención y Control Ambiental, tres dar l'anuncia agradeció "la collaboración creciente y concienciación ciudadana, asina como les midíes preventivas que se punxeron en marcha por parte de la industria y los puertos pa disminuyir no posible les emisiones de partícules contaminantes". D'igual forma, afala a siguir nesta llinia dao que, anque les condiciones de ventilación ameyoren, no tán previstes lluvies abundantes la selmana próxima.

Nueche "horrorosa de calidá del aire en Xixón"

"Mientres les escondíes estaciones de control del Gobiernu d'Asturies siguen baxando los ellevaos niveles que tuvieron a lo llargo de la selmana, la estación del Conceyu de Xixón ubicada al llau del xeriátricu de La Calzada sigue disparada y aumentando", alerten dende la Coordinadora Ecoloxista d'Asturies tres una nueche que califiquen de "horrorosa de calidá del aire en Xixón hasta col protocolu de contaminación activáu". "Hai que recordar que tolos díes respiramos, por eso ye importante lo que respiramos, cosa de la que paez nun enterase'l Gobiernu d'Asturies, que minimiza'l problema grave de la contaminación industrial del aire que llevamos décadas careciendo. L'ameyoramientu de la contaminación queda a depender de la meteoroloxía, qu'aumente'l viento, que llueva... Eso nun ye una política de prevención de la contaminación".

Na semeya, el sínter d'ArcelorMittal anueche.

Contador Estadistiques