El sábadu desactivóse'l protocolu d'actuación por contaminación

Namái se caltenía en Xixón y Uviéu.

"D'alcuerdu colos niveles de calidá d'aire actuales y les previsiones meteorolóxiques", Mediu Ambiente decidió "desactivar el protocolu nes dos zones que se mantería ayeri activáu, esto ye, en Xixón y n'Uviéu", apuntó'l sábadu Elena Marañón, direutora xeneral de Prevención y Control Ambiental. En dambes zones llevaben en nivel 1, avisu, dende'l domingu, que se rebaxó a 0 n'Uviéu'l vienres.

Según les midiciones de les estaciones de la rede oficial de calidá del aire, en Xixón les concentraciones rexistraes na avenida Arxentina, el valor de partícules de diámetru inferior a diez micres (PM 10) foi de 38 microgramos por metru cúbico d'aire (µg/m³ ), "mui perbaxo inclusivu del valor mínimu del nivel 0 del protocolu". N'Uviéu sigue alta na estación del Palaciu de Deportes, onde "la disminución nun foi tan significativa", pero tamién ensin llegar a les cifres qu'afite activar el protocolu.

Crítiques a la midida

Dende la Coordinadora Ecoloxista d'Asturies calificóse de "vergoña que teniendo valores disparaos de contaminación en Xixón se desactive'l protocolu de contaminación", lo que consideren "una amuesa más de que sólo se tienen en cuenta los datos de les estaciones escondíes, por más declaraciones que se faigan". Nesi sen, recuerda que'l Gobiernu nun da de siguío los de les 45 estaciones público-privaes esistentes "porque son peores datos que los de les 22 escoyíes, de les que sí da datos en continuu, nuna demostración continua de falta de tresparencia".

Asina, los ecoxistes apuntaron que la estación la Unidá Movil de Vixilancia de la Calidá del Aire de Xixón rexistró n'El Lauredal, na zona oeste de la ciudá, una media de 78 µg/m³ nes 24 hores previes, con picos de 172 na mañana del sábadu, cifres llonxanes a les 38 de la de l'avenida Arxentina.

Na imaxe, una industria echa fumu a l'atmósfera esta selmana mientres taba activáu'l protocolu en nivel 1. Semeya propiedá de la Coordinadora Ecoloxista d'Asturies.