Seis empreses acompañen a Iniciativa pol Asturianu nel so puestín na FIDMA

Iniciativa pol Asturianu participa per segundu añu na Feria Internacional de Muestres d’Asturies (FIDMA) pa dar a conocer el so llabor y ganar socios nuevos. Al igual que fixo na edición pasada, cede espaciu nel so puestín a seis empreses comprometíes pa col idioma pa que vendan los sos productos y se promocionen.

El pabellón númberu 3 ye’l llugar onde ta instaláu Iniciativa pol Asturianu. Nesi espaciu los visitantes pueden conocer de primer mano qué ye la función que desendolca la organización, asina como asociaciose si tienen interés en collaborar.

D’igual forma, tienen accesu a información y productos de les seis empreses a les que-y cede un espaciu nel puestín, toes elles comprometíes pa col idioma. D’elles, cuatro repiten del añu pasáu, esto ye, Ediciones Trabe, Saltadera, Miguina de Pan y CuatroGotes Producciones, mentes que s’estrenen Cartonajes Vir y la cervecera artesanal Ordum.

Firmes d’escritores

Mientres los díes que se celebra la FIDMA van entamase tamién nesti espaciu firmes d’escritores, previstes a les 18 hores. Los autores yá anunciaos son Gonzalo G. Barreñada (güei), Xuan Xosé Sánchez Vicente (mañana), Berta Piñán (xueves), Marta Mori (sábadu), Dolfo Camilo Díaz (miércoles 15) y Elvira Laruelo (xueves 16).

Otra manera, al igual que l’añu pasáu, espérase qu’autoridaes de tolos collores políticos visiten el puestín d’Iniciativa pol Asturianu a lo llargo del certame.