El DMR recuerda la Revolución d’Ochobre del 34 con delles actividaes na cuenca’l Nalón

Darréu entama esti vienres y el sábadu na cuenca’l Nalón el Día de la Moceda Revolucionario (DMR). Una charra, un homenaxe a Belarmino Tomás, una Nueche en Danza, una xinta y una ruta per escenarios de la Revolución d’Ochobre del 34 van preceder a una edición nueva del conciertu ‘Asturies Nun Escaez’.

El Centru Social Autoxestionáu La Semiente, en L’Entregu, va acoyer la primer actividá d’esta edición del DMR mañana a les 18.30 hores. Militantes de la organización moza nacionalista gallega Isca! van poner la charra ‘Esperiencies de la llucha xuvenil en Galiza’, un contestu “bien averáu a nós y del que podemos deprender y compartir abondos aspeutos: les lluches desendolcaes, los pilancos sufríos…, na llucha por un país llibre, soberanu, y nel que la mocedá cunte col futuru que-y correspuende”, espliquen dende Darréu.

Col atapecer llegará’l componente festivu del DMR. El Colexu Públicu José Bernardo, en Sama, acueye una Nueche en Danza na que van participar Tuenda, Los Collacios y Cuatrolán nuna apuesta “por esparder la música del país na so vertiente tradicional, que non por ello menos aprovechable como parte fundamental na recuperación y actualización de los nuesos raigaños culturales”. L’eventu ye de baldre y va contar con micro y escenariu abiertu.

Actividá centrada en Llangréu

Un homenaxe a Berlamino Tomás na cai que lleva’l so nome en La Felguera, de magar les 13 hores,  va ser l’actividá qu’abra’l sábadu. Llueu, a les 14.30 hores, va celebrase una xinta popular nel José Bernardo, a un preciu de 5 euros, pa lo que ye preciso apuntase enantes. La organización ufre un menú veganu pa la xente que prefiera esta alternativa.

Yá de tarde, a les 17 hores, ta prevista una ruta pelos principales escenarios de la Revolución de la mano de la historiadora Amaya Caunedo con salida del Parque Vieyu de La Felguera, pa continuar a les 20 hores col conciertu ‘Asturies Nun Escaez” nel José Bernardo. Esta actividá aniciad nel so momentu por Andecha Mocedá y recuperada por Darréu vive la so decimotercer edición y va contar cola presencia de los grupos llocales Misiva, Años de Plomo, Skama la Rede y Escuela de Odio, amás de los navarros Vendetta y del raperu catalán Pablo Hasel.

El preciu de les entraes ye de 10 euros anticipada y de 12, na puerta, siendo los puntos de venta los siguientes: Matteria, en La Felguera; El Cuévano, en La Pola Siero; Chigre Ochobre, en L'Entregu; Paralelo Social Club, en La Pola Ḷḷena; L’Abellugu, en Mieres; Corquiéu, en Ribeseya; La Industria, en Sama; L’Esperteyu y el Llar La Llegra, n'Uviéu; La Bodega, en Villaviciosa; y Omertá y Sidrería Canteli, en Xixón.

Charra d’Anna Gabriel n'Uviéu

El DMR, sicasí, nun fina esta fin de selmana. Complétase’l sábadu 22 con una charra nel uviedín Llar La Llegra de la diputada nel Parlament de Catalunya pola CUP, Anna Gabriel. Ésta lleva’l nomde de 'Feminismu, cuestión de xéneru y medios de comunicación'.