El XIII Asturies Nun Escaez completa'l cartelu con Misiva y Pablo Hasel

Darréu yá tien avanzada la programación del Día de la Mocedá Revolucionario (DMR) que va tener llugar en Llangréu los díes 14 y 15 d'ochobre. El sábadu va celebrase'l XIII Asturies Nun Escaez con Misiva, Pablo Hasel, Años de Plomo, Skama la Rede, Vendetta y Escuela de Odio.

L'actividá torna asina a Llangréu tres la suspensión del añu 2011 del conciertu “por mor del traficu d'influencies, presiones y acosos caciquiles” fechos dende’l Conceyu de Llangréu, según señaló nel so momentu Darréu. Naquel tiempu'l PSOE gobernaba nel conceyu, con Esther Díaz como alcaldesa, que se negó a ceder l’usu del Colexu Públicu José Bernardo namái dos díes enantes de la fecha del conciertu, obligando a Darréu a tomar la decisión doliosa de nun celebralo pese a tar too organizáu y tener decenes d'entraes vendíes.

Nun foi hasta'l 2014 cuando volvió a entamase l'Asturies Nun Escaez –non asina'l DMR, que siguió organizándose–, con dos ediciones n'Uviéu, pa tornar esti añu a Llangréu, precisamente al Colexu Públicu José Bernardo de Sama, pese a que nun primer momentu taba previstu que fora en La Felguera. El conciertu va celebrase'l sábadu, de magar les 20 hores, con un cartelu formáu polos grupos llocales Misiva, Años de Plomo, Skama la Rede y Escuela de Odio, amás de los navarros Vendetta y del raperu catalán Pablo Hasel.

El preciu de les entraes ye de 10 euros anticipada y de 12, na puerta, siendo los puntos de venta los siguientes: Matteria, en La Felguera; El Cuévano, en La Pola Siero; Chigre Ochobre, en L'Entregu; Paralelo Social Club, en La Pola Ḷḷena; L’Abellugu, en Mieres; Corquiéu, en Ribeseya; La Industria, en Sama; L’Esperteyu y el Llar La Llegra, n'Uviéu; La Bodega, en Villaviciosa; y Omertá y Sidrería Canteli, en Xixón.

Nueche en Danza y Nueche Folk

El vienres, mientres, va celebrase una Nueche en Danza y Nueche Folk nel mesmu José Bernando nel que va participar Tuenda xunto con Los Collacios y Cuatrolán depués de que nin Duerna nin Amieva, anunciaos nun primer momentu, puedan actuar por asuntos llaborales de los sos músicos. Esti eventu ye de baldre y va contar con escenariu llibre y micro abiertu pal que quiera participar.

Otra manera, van entamase mientres estos dos xornaes delles actividaes en Llangréu, a lo qu'hai que sumar la presencia'l sábadu siguiente, día 22, nel uviedín Llar La Llegra de la diputada nel Parlament de Catalunya pola CUP, Anna Gabriel, que va poner la charra 'Feminismu, cuestión de xéneru y medios de comunicación'.