El cribáu de Xomezana Riba permite detectar 2 casos más de COVID-19
|
29 Setiembre, 2020 por Redacción
- Inicie sesión o rexístrese pa espublizar comentarios
Salú informa de 67 contaxos esti llunes.
El cribáu entamáu ayeri en Xomezana Riba, pueblu con altu númberu de población de riesgu, a 72 vecinos depués de 7 casos positivos de COVID-19 permitieron llocalizar a 2 afeutaos más pola enfermedá causada pol coronavirus SARS-CoV-2. Güei ye'l turnu de los habitantes de Sobrefoz, a la que tán llamaos un total de 40, tres la detección de 3 positivos.
La Conseyería de Salú informó de 67 contaxos na xornada d'ayeri, de los que 3 son de Llaviana tres el cribáu nuevu fechu a rapazos del conceyu. 3 persones necesitaron ingresu hospitalariu y les demás son asintomátiques o tienen síntomes leves y tán aisllaes nos sos llares.
La tasa de positividá sigue per debaxo del 5 por cientu
El Serviciu de Salún del Principáu d'Asturies (SESPA) fixo ayeri 2.772 pruebes PCR, polo que la tasa positividá queda nel 2,42 por cientu, siempre perbaxo del 5 por cientu afitáu como llende pa tener controlada la pandemia. Otra manera, 4 persones diagnosticaes en díes anteriores tuvieron que ser hospitalizaes y otra más ingresó na UCI, anque los datos oficiales rexistren 2 menos en planta (47) y 3 más en cuidaos intensivos (17).
Les altes epidemiolóxiques vivieron un fuerte aumentu, 37, que ponen el total dende l'entamu del andanciu en 2.264.
Na semeya, dispositivu montáu en Xomezana Riba pa facer pruebes PCR.
Efrén d'Andrés
