Un biltu en Xixón acumula 13 positivos, mentes que’l cribáu de Sobrefoz permite detectar 5 casos más de COVID-19

Los datos de COVID-19 dexaron 66 casos nuevos esti martes, con una tasa de positividá del 1,87 por cientu, y dos muertes. El focu ta puestu agora en Xixón, onde un biltu en dos chigres d’alterne de Porceyo acumula 13 positivos, mentes que’l cribáu fechu en Sobrefoz permitió detectar 5 contaxos más.

La Conseyería de Salú fixo un llamamientu a los veceros de los establecimientos Vaya Bull y Bora-Bora, nel polígonu industrial de Porceyo, ente los díes 10 y 26 de setiembre pa facer un estudiu ampliáu de contautos por mor d’un biltu de coronavirus SARS-CoV-2, pa lo qu’encamienten a cumplimentar esti formulariu o llamar al teléfonu 984.10.00.51. Hasta’l momentu 13 persones venceyaes a estos llocales dieron positivu, mentes que 24 punxéronse en contautu coles autoridaes sanitaries tres la convocatoria fecha na tarde d’ayeri, a los que se-yos pide llendar la so vida social y fortalecer les midíes de prevención mientres se valora la necesidá de que se faigan una PCR.

De les 66 positivos del martes, 5 pertenecen a Sobrefoz, llugar nel que s’entamó un cribáu al ser una población con un alto índiz de vecinos vulnerables depués de que se detectaran 3 casos nesti llugar ponguetu. Ayeri fixéronse 3.528 PCR n’Asturies, polo que la tasa de positividá foi del 1,87 por cientu, lloñe del 5 por cientu que llevaría a prender toles alarmes.

Na xornada hai que llamentar la muerte de dos persones, que faen aumentar la cifra total de finaos hasta 352. Trátense de dos muyeres de 84 y 89 años, la de mayor edá residente nun centru sociosanitariu.

70 hospitalizaos

Nestos momentos hai ingresaes 70 persones, 16 na UCI y 44 en planta. Este cifres son 1 y 3 menos que’l llunes, de manera respeutiva.

El númberu d’altes epidemiolóxiques ayeri algamó les 5, polo que’l total de curaciones queda en 2.269.

Na semeya, dispositivu montáu en Sobrefoz pa facer pruebes PCR.