Siguen aumentando los casos de COVID-19: 92 diarios de media na selmana última

Nos siete díes anteriores la cifra foi de 83.

Asturies sumó 304 casos nuevos de COVID-19 esta fin de selmana según los datos oficiales tresmitíos al Ministeriu de Sandidá, con 129 el vienres, 109 el sábadu y 64 ayeri, según les notificaciones diaries llueu correxíes. Esta cantidá aumenta a 92 los casos diarios de media nos siete díes últimos al pasar de 4.625 a 5.267, lo que confirma la evolución ascendente de la pandemia nestes selmanes de la segunda fola: 39, 46, 52 y 83.

La Conseyería de Salú anunció cribaos en Xomezana Riba y Sobrefoz tres detectar 7 y 3 positivos, de manera respeutiva, y ser llugares con una numberosa población vulnerable al coronavirus SARS-CoV-2. En total, na población ḷḷeniza tán llamaos a facer una prueba PCR 72 vecinos, y na pongueta, 40, siendo estos casos los primeros que se rexistren nesti conceyu dende l'entamu del andanciu.

Una muerte más

Nestos trés díes últimos hebo que llamentar un muerte, el sábadu, una muyer de 74 años ensin rellación con centros residenciales sociosanitarios. Ye la persona númberu 350 que pierde la vida con COVID-19 nel país.

Na UCI hai anguaño 14 hospitalizaos, 3 más que'l xueves, y en planta, 49, 2 menos. 4 enfermos recibieron l'alta epidemiolóxica, polo que'l total de curaos queda en 2.227.

Na semeya, los vecinos de Xomezana Riba acuden a facer la prueba PCR.