El Conceyu d’Avilés aprobará tamién una proposición de sofitu a la oficialidá del asturianu

|
Plenu Avilés xunetu 2017

Somos Avilés, Izquierda Xunida (IX) y Ganemos Avilés van llevar al Plenu del xueves una proposición sobre la oficialidá na que piden avanzar hacia ella y instar al Gobiernu y la Xunta Xeneral entamar un diálogu sobre esti asuntu y refomar l’Estatutu. Estos grupos cuenten  sacala alantre col apoyu o l’astención del PSOE.

En concreto, la propuesta apunta que “ye'l momentu d'avanzar na oficialidá del asturianu como elementu fundamental pa la so dignificación normativa y la so normalización social” y, “nesti sen, insta al Gobiernu d'Asturies y a les distintes fuercies polítiques con representación parllamentaria a entamar un diálogu y llograr un consensu col fin d'algamar esti oxetivu, qu'acabaría cola reforma del Estatutu d'Autonomía d'Asturies nun procesu qu'incluya nel mesmu la oficialidá de la llingua asturiana”. Nestos momentos, esisten negociaciones col PSOE pal apoyu de la moción, que s’espera que lleguen a bon puertu.

Les pretensiones del partíu gobernante n’Avilés ye que la proposición nun se ciña a la presente llexislatura, mentes que pa los grupos que la lleven a Plenu ye innegociable que nun se condicione a una reforma constitucional. La forma final que se vote’l xueves podría recoyer que se trate la reforma del Estatutu y la declaración de la oficialidá na llexislatura próxima.

Cola aprobación d’esti “alcuerdu sobre la oficialidá de la llingua asturiana na próxima reforma del Estatutu d'Autonomía d'Asturies”, el Conceyu d’Avilés siguirá’l mesmu camín que los d’Uviéu y Xixón. Na capital del país, foi l’equipu de gobiernu formáu pol PSOE, Somos Uviéu y IX los que sofitaron la oficialidá, mentes que na villa de Xovellanos aprobóse la propuesta de Xixón Sí Puede y IX d’avanzar hacia ella ensin marcar un calendariu –condición ésta última de los socialistes–, tamién colos votos a favor de Foro.

Contador Estadistiques