El Centro Asturiano de Madrid da'l so 'Urogallo' de llingua asturiana a Humberto Gonzali

Francisco Rodríguez García recibe'l títulu de presidente d'honor y Florentino Díaz Fernández, Ignacio García-Arango y Juan Tamargo, el premiu 'Manzana de oro'.

Esta selmana'l Centro Asturiano de Madrid dio a conocer los sos gallardones correspondientes al 2016, entes les que destaca la estaya de Llingua Asturiana. Nesta ocasión el premiáu ye Humberto Gonzali, escritor y promotor cultural nacíu en Figareo y residente en Xixón que lleva toda una vida dedicada a la divulgación de la cultura asturiana y del idioma.

Miembru nel so tiempu de Conceyu Bable y secretariu nel 1985 de la Xunta pola Defensa de la Llingua Asturiana, anguaño ye'l presidente de l'Asociación Cultural L'Arribada. Nel palmarés del 'Urogallo' asocede al filólogu, traductor y investigador Pablo Suárez García, autor de la torna al asturianu del Quixote, ente otros testos clásicos.

El restu de premiaos con 'Urogallo' son los siguientes: Juan Luis Gutiérrez ('Artesanía'), El Perendengue ('Baile'), Odón García del Peganéu ('Tonada'), Agrupación Polifónica del Centro Asturiano de Avilés ('Corales), Rubén Alba ('Gaita'), Restaurante Casa Lula de Tinéu ('Gastronomía'), Beatriz y su acordeón ('Personaje Popular'), Asociación Profesional de Guardas del Medio Natural del Principado de Asturias ('Defensa de la Naturaleza'), Xiringüelu de Pravia ('Festejos') y Raquel Rodríguez Rodríguez ('Deportes'). Reciben un 'Urogallo' especial el periódicu 'El Fielato' y el maestru pasteleru d'Avilés Miguel Sierra, mentes que'l tenor y investigador de la canción asturiana José Manuel Menalva y la Fundación EDES tienen una mención especial.

Restu de títulos

El títulu de presidente d'honor del Centro Asturiano de Madrid recayó nel empresariu lácteu Rodríguez García. Otra manera, esti añu concédense trés 'Manzanas de oro', que son pa Díaz Fernández, ún de los socios más veteranos de la entidá; pa García-Arango, presidente de la Fundación Foro Jovellanos; y pa Tamargo, caderalgu de la Facultad de Farmacia de la Universidad Complutense de Madrid.

Completen les distinciones d'esti añu'l títulu de 'Asturiano Universal', que ye pal reximientu d'Infantería Príncipe númberu 3; el de 'Asturiana Predilecta en Madrid', que recai n'actriz Paula Echevarría; el de 'Entidad Asturiana del Año', pa Gruas Roxu; y el de 'Asturiano Adoptivo', que recibe Fernando Robredo. Por último, Asunción Laredo y José Rey, son nuevos socios d'honor.