La Compañía Asturiana de Comedias lleva un 'Urogallo' especial

El Centro Asturiano de Madrid anuncia la concesión a esti grupu teatral d'un 'Urogallo' especial con mención honorífica.

Selmanes depués de dar a conocer el llistáu de ganadores de los gallardones correspondientes al 2016, la xunta direutiva del Centro Asturiano de Madrid decició conceder un 'Urogallo' especial con mención específica a la Compañía Asturiana de Comedias. D'esta forma, el veteranu grupu teatral lleva un premiu nesta categoría xunto col tenor y investigador de la canción asturiana José Manuel Menalva y la Fundación EDES.

Creada nel 1915, la Compañía Asturiana de Comedias tuvo una primer etapa con un esplendor especial nes décades de los 40 y los 50, llevando pel tol mundu les obres de creadores asturianos como Pachín de Melás, Manuel Llaneza o Agustín de la Villa, ente otros munchos. Tres una época na que vivió años malos, nel 1986 el grupu teatral entama una segunda etapa na que recupera'l so puestu cabezaleru dientro la escena asturiana.