Salú actualiza'l pasaporte COVID-19 coles modificaciones aprobaes pola Comisión Europea

Esti miércoles rexistráronse 1.445 casos nuevos nuna xornada na qu'hebo 7 finaos.

La Conseyería de Salú actualizó'l certificáu COVID dixital, conocíu como pasaporte COVID-19, pa incluyir a les persones vacunaes con una dosis que pasaren la enfermedá y les inmunizaes con Janssen, que contaba con pauta completa d'una única dosis. D'esta forma adáptase'l documentu a les modificaciones aprobaes pola Comisión Europea pa facilitar la movilidá de la ciudadanía pel territoriu comunitariu.

"Les autoridaes europees modificaron esta selmana les condiciones del certificáu COVID y n'Asturies yá se fixeron los cambios necesarios pa que cualquier persona que los necesite bien porque viaxa a otru país o bien porque lo fai a otra comunidá como Galicia o La Rioja, o otres onde lu esixen p'acceder por exemplu a los establecimientos d'hostelería, puedan solicitalo yá actualizáu dende güei mesmo", esplicó'l conseyeru Pablo Ignacio Fernández Muñiz depués de la xunta telemática del Conseyu Interterritorial del Sistema Nacional de Salud, onde s'aldericó sobre la obligatoriedá del usu de mázcara al aire llibre. El periodu de validez del pasaporte COVID ye de 9 meses dende'l pinchazu.

3 casos más confimaos d'ómicron silenciosa

La seición de Viroloxía del Llaboratorio de Microbioloxía del Hospital Universitariu Central d'Asturies (HUCA) confirmó que 3 de los 4 casos sospechosos d'ómicron silenciosa tan infestaos por esta variante más contaxosa. El vienres anunciábase la detección del primera persona n'Asturies afeutada.

Los contaxos aumentaron ayeri con respeuto al día anterior, al rexistrase 1.445, esto ye, 55 más. Na xornada finaron 7 persones, 3 muyeres de 94, 90 y 90, y 4 homes de 88, 87, 65 y 52, polo que l'acumuláu nel andanciu xube a 2.321.

Hai 436 pacientes ingresaos con confirmación o sospecha de COVID-19, 7 menos que'l llunes. D'ellos 395 tán planta, 6 menos, y 41 na UCI, 1 menos.