El 46 por cientu de los llectores d’Asturies.com aprueba’l desaniciu del impuestu de socesiones

El caltenimientu o non del impuestu de socesiones divide a la sociedá asturiana, como amuesa’l nuesu ‘Conceyu Abiertu’. Un 46 por cientu de los usuarios d’Asturies.com apuesta por desanicialu, mentes qu’un 29 por cientu prefier qu'esti tributu defendíu dende la izquierda siga esistiendo anque con un axuste del mesmu.

La entruga plantegada nesta ocasión a los llectores yera ‘¿Aprueba’l desaniciu del impuestu de socesiones?’, a lo qu’un 46 por cientu espresó que ‘Sí’. Mentes, el 54 por cientu restante repartióse ente la opción ‘Non’ (24 por cientu) y ‘Habría de caltenese pero con un axuste del mesmu’ (29 por cientu).

El desaniciu del impuestu de socesiones ye la bandera que ta ximielgando nos años últimos el PP. Inclusive, foi l’asuntu que punxeron los populares enriba la mesa pa sofitar los presupuestos de la FSA nesti 2017, llegando a un alcuerdu pa una modificación qu’aumente’l mínimu exentu de 150.000 a 300.000 euros.

IX, ye la formación que, por contra, vien defendiendo con más puxu esti tributu que grava la tresmisión de bienes ente persones físiques, mentes que’l presidente socialista Javier Fernández afirmó la selmana pasada nel Plenu de la Xunta Xeneral que ve “absurdu” la so supresión. Recientemente una platafoma presentó 108.738 firmes énte’l Parllamentu pa reclamar la retirada del impuestu.

‘Conceyu Abiertu’ nuevu

Dende esti momentu yá ye posible participar nun ‘Conceyu Abiertu’ nuevu. Nesta ocasión préstanos conocer la opinión de los nuesos llectores sobre’l preciu de la sidra tres el llamamientu fechu por llagareros y hosteleros nun foru públicu pa xubir el mesmu, llegando a asitiar el costu ideal de la botella nos chigres ente los 5 y 7 euros.