Llamazares encamienta a Fernández a esplicar qué gastos va suprimir de menguar l’impuestu de socesiones

|
Gaspar Llamazares y Concha Masa

Gaspar Llamazares, voceru d’IX na Xunta Xeneral, amosó esti llunes el so esmolecimientu pola mengua pautada ente la FSA y el PP del impuestu de socesiones. Encamienta a Javier Fernández a esplicar qué gastos va suprimir pa contrarrestar la baxada d’ingresos.

“Vamos entrugar al Gobiernu, al presidente del Principáu, qué midíes piensa adoptar pa favorecer la xusticia fiscal y, al empar, el caltenimientu de los servicios públicos”, avanzó Llamazares esta mañana. “Tamos mui esmolecíos en rellación cola financiación d’esta comunidá autónoma, non sólo na del Estáu; la comunidá autónoma tamién tien un papel na financiación de los servicios públicos: que sía xusta, esto ye que se faiga d’alcuerdu cola renta, y vidable pal futuru”, añadió’l voceru de la coalición, qu’afala a Fernández “a exercer el so liderazgu nesta materia que nos paez vital p’Asturies”.

Con respueto al impuestu de socesiones, insistió na posición contraria d’Izquierda Xunida (IX) al so desaniciu “porque creemos que tamos rebaxando ensin más los impuestos cuando se trata fundamentalmente d’ameyoralos y harmonizalos ente comunidaes autónomes, non suprimilos”. “Hai un coleutivo que presiona y naide s’entruga qué va significar la supresión del impuestu y qué impuestu va sustituyilu; si se va sustituyir un impuestu direutu por otros indireutos. Y naide se pregunta qué se va suprimir de los servicios públicos”, siguió Llamzares, qu’entiende que “si se reducen los ingresos hai qu’esplicar ónde se reducen los gastos”, poniendo como víctimes posibles de la midida’l salariu mínimu, una parte de la renta básica o inclusive del gastu sanitariu.

Defensa de la xestión nacional del llobu

El voceru d’IX tamién anunció que’l so grupu tamién va llevar al Plenu d’esta selmana una moción subsiguiente a apellación sobre’l llobu. Sobre esti asuntu, amosó la so disconformidá sobre les “acusaciones inxustes” de conservacionistes na manifestación celebrada en Madrid en defensa de la especie, “porque nun se correspuenden cola verdá”.

“Asturies tien un modelu de xestión, mentes otres comunidaes autónomes nun tienen absolutamente nada, que concilia la proteición del llobu cola non menos importante proteición de los ganaderos y campesinos”, defendió Llamazares.

Na semeya, Llamazares y Concha Masa na Xunta de Voceros.

Contador Estadistiques