El PP sofita los presupuestos de la FSA tres pautar una reforma del impuestu de socesiones

|
El PP sofita los presupuestos de la FSA tres pautar una reforma del impuestu de socesiones

Populares y socialistes pautaron na tarde-nueche del miércoles una reforma del impuestu de socesiones, aumentando’l mínimu exentu de 150.000 a 300.000 euros. Esti alcuerdu va facilitar el sofitu del PP a los presupuestos de la FSA, evitando asina una segunda prórroga.

La presidenta del PP n’Asturies, Mercedes Fernández, anunciaba esta mañana esti pautu ente les dos formaciones mayoritaries na Xunta Xeneral, “un alcuerdu por Asturies, en defensa del interés xeneral de los asturianos, non un alcuerdu entre partíos”. La clave pal sofitu popular ye una reforma del impuestu de socesiones, tributu que’l PP pretendía desaniciar.

"Gracies al PP, los asturianos beneficiaránse d’una rebaxa sustancial nel impuestu de socesiones”, quixo vender Mercedes Fernández. La modificación pautada consiste n’aumentar el mínimu exentu de 150.000 a 300.000 euros, dalgo colo que la popular considera qu’Asturies sal "del agraviu comparativu en que nos tien inmersa la izquierda”.

“Como nun yera posible correxir a la baxa l’impuestu de socesiones al traviés d’enmiendes al presupuestu, que seríen calificaes de totalidá, lo que supondría devolvelo al Gobiernu, alcordamos que se se remita a la Xunta una llei que regule l’impuestu y qu’entre en vigor nel 2017”, esplicó. Darréu alvirtió que si les enmiendes de totalidá presentaes por otros grupos consiguen devolver el proyeutu al Gobiernu, “Asturies sigue con un mínimu exentu de 150.000 euros, y con un error de saltu gravosu y inxustu”, polo que’l PP va votar en contra les que presenten Podemos, Izquierda Xunida y Foro que se van aldericar mañana na Xunta Xeneral.

Otros alcuerdos algamaos ente’l PP y la FSA dientro d’esa reforma del impuestu de socesiones son una ameyora de les condiciones fiscales de la vivienda habitual y de les esplotaciones rurales.

Contador Estadistiques