El 29 de payares será la fecha definitiva de la llegada de la velocidá alta ferroviaria a Asturies

La variante de Payares va inaugurase’l 29 de payares y el 30 va recibir los primeros Alvia comerciales. Asina lo confirmó esti xueves Raquel Sánchez Jiménez na so visita a Asturies con motivu de la puesta en serviciu del tercer carril de la Y, lo que va poner fin a una obra clave pal país cuasi 20 años depués del so entamu y con 14 de retrasu.

Agora sí que yá paez la definitiva, una vegada que finaron les pruebes de seguranza de los túneles que retrasaron la última de les munches daes dende Madrid, la última marcada pa mayu. Va ser el 29 de payares, un día nel que “arranca la década del cambiu”, aseguró'l presidente Adrián Barbón na rede social X.

Va ser con trenes Alvia, yá que los Avril, que dupliquen la capacidá de pasaxeros, nun van tar hasta avanzada la primavera. Otra manera, entovía nun se sacaron a la venta los billetes del 30 de payares hacia alantre y la ministra nun avanzó’l preciu del billete.

“La variante de Payares, una de les obres más esperaes, va suponer un auténticu xiru copernicanu nel tresporte ferroviariu, con más frecuencies de tolos servicios, más places y más d’una hora menos de viaxe dende Uviéu o Xixón a Madrid, llegando tamién a Avilés”, apuntó la ministra de Tresportes, Movilidá y Axenda Urbana en funciones. Lo cierto ye que la velocidá alta ferroviaria namás va aportar hasta La Pola, siguiendo’l mesmu tren el percorríu pela vía actual y colos mesmos tiempos de viaxe.

Fin de les obres na Y

La visita de la ministra a Asturies prodúxose pola inauguración del tramu de 4,4 quilómetros de la Y ente los enllaces de Llugones y La Matalablima pa l’ampliación de la calzada de dos a trés carriles, asina como la remodelación de les incorporaciones, tamién ña de Paredes. Les obres entamaron en payares del 2019, obligando estos años a circular a una velocidá máxima de 60 quilómetros per hora a los vehículos nesti percorríou.

Los cambios nos indicadores del llugar permitieron por fin la incorporación de la toponimia asturiana, única oficial, nos mesmos. Asina pueden vese los nomes de llugar Gijón/Xixón, Oviedo/Uviéu o Lugones/Llugones, anque na inauguración de güei emplegáronse namás ‘Lugones’ y incorrectamente ‘Matalablima’ cuando la forma que s’oficializó foi La Matalablima.

Na semeya, Sánchez Jiménez y Barbón comparte paragües mientres caleyaben hacia la carpa instalada xunto a l'autopista onde taba programáu l'actu d'inauguración.