Educación espubliza les instrucciones pal desarrollu del plan esperimental pa facer l’asturianu llingua vehicular

La Conseyería d’Educación y Cultural espublizó nel BOPA d’esti martes les instrucciones pal desarrolu del plan pilotu pa emplegar l’asturianu como vehicular en Primaria. Ésti va desendolcase namái en cuartu cursu nuna de les cuatro árees propuestes.

El Boletín Oficial del Principáu d'Asturies (BOPA) d’esti martes espublizó, con una entrada única en castellanu, les instrucciones pal desarrollu d’un Plan Pilotu esperimental de Promoción del Usu del Asturianu pal añu académicu 2017-2018. Éstes afiten les condiciones pa los centros pa poder acceder al mesmu en cuartu de Primaria, como ye tener una matriculación en Llingua Asturiana non inferior al 75 por cientu, o les árees onde van poder dase una materia nel idioma: Ciencies Sociales, Ciencies Naturales, Educación Artística o Educación Física.

Dende la conseyería anuncióse que mediu docena de centros van formar parte d’esti plan anunciáu. L’establecimientu de proyeutos pilotos d’usu del vehicular del idioma en tolos niveles educativos yera ún de los puntos qu’afitaba’l pidimientu d'un Plan de Dignificación del Asturianu, consensuáu pola FSA-PSOE, Podemos, IX y Foro, y que recibió’l preste de la Xunta Xeneral el 16 d’ochobre del 2015 cola astención de Ciudadanos y el votu en contra del PP.