Coleutivos de defensa del idioma y Podemos carguen contra los planes d'Educación pa col asturianu

|

Nin el plan esperimental pa facer l’asturianu llingua vehicular en Primaria nin la manera d’introducir l’idioma nel currículu n’Infantil presten a los coleutivos de defensa de la llingua. La XDLA y Iniciativa pol Asturianu carguen contra Educación, al igual que fai Podemos.

“El plan pilotu del asturianu muestra qu'ensin oficialidá too mengua”, afirma la Xunta pola Defensa de la Llingua Asturiana (XDLA), que critica que “depués de cuasi dos años de xestión de Xenaro Alonso y Fernando Padilla, nada cambió”. El coleutivu cívicu apunta que sólo hebo “bones palabres” y recuerda que “la Llei d'Usu sigue bloquiada nel so desarrollu, l'asturianu nun s'usa na publicidá institucional, la TPA sigue marxinando esti idioma na so programación, l'apoyu –por llamalu de dalguna manera– a la nuestra industria cultural ye tercermundista y de la presencia del nuestru idioma nel sistema educativu meyor nun falar”.

Tres facer referencia a la paralización de la creación de la especialidá docente, señala que “l'anunciada gran midida de la llexislatura en política llingüística, la puesta en marcha d'un plan pilotu pal usu del asturianu como llingua vehicular nes escueles, queda en papel moyao. Asina, depués de publicase la resolución pola que s’establecen les instrucciones pal desenvolvimientu d’un Plan Pilotu Esperimental de Promoción del Usu del Asturianu pal añu académicu 2017/ 2018 vemos que d'usar l'asturianu como llingua vehicular poco”.

La XDLA critica que sólo sía una hora selmanal “que nin va ser dafechu n'asturianu porque la resolución establez que nun se va emplear  n’esclusiva la llingua asturiana, ‘sinón que tamién va asegurase l’adquisición de la terminoloxía específica del área en llingua castellana’”, y qu’esta llingua va ser la predominante nel aula. Tamién apunta que nun van ameyorar les condiciones del profesoráu “porque s'establez que nun va haber nomamientos nuevos o ampliaciones de xornada. Una situación absurda que muestra lo que supón tratar de facer esto nun marcu de non oficialidá”.

“Manifestamos otra vuelta la nuestra reivindicación de la oficialidá de les llingües d’Asturies como ferramienta de normalización tamién nel ámbitu educativu, per un llau garantizando la incorporación digna de la enseñanza del asturianu y el gallego-asturiano al currículu de tolos niveles educativos y, per otru, como fundamentu pa la creación de la especialidá pal profesoráu de los cuerpos de maestros/es y de profesores d’enseñanza secundaria, que desanicie la precariedá y la desigualdá que carecen anguaño”, insiste la XDLA.

Cesión énte les amenaces del PP

La formación política Podemos tamién amuesa la so disconformidá colos planes d’Educación pal Asturianu y afirma que “el Gobierno asturiano cede énte les amenaces del PP y incumple los sos propios planes pal asturianu como llingua vehicular na Educación Primaria”. La organización morada, qu’aceptó dichos planes de primeres pese lo curtiu que yera’l proyeutu sólo pol fechu de que se punxera en marcha, carga contra’l conseyeru Alonso polos recortes que sufrió’l mesmu.

“La esplicación única que se nos ocurre ye la inercia a la qu’últimamente respuende la FSA pa nun enfadar al Partido Popular. Desconocemos qué-yos deben, por qué esi mieu nuna midida que despertaba consensu na comunidá educativa y qu’en toda Asturies sólo foi contestada pol Partido Popular”, apunta Lluis Miguel Orviz, responsable de Derechos Lingüísticos de Podemos Asturies.

Educación Infantil

Iniciativa pol Asturianu, pela so parte, asegura “que tres de la modificación del Decretu 85/2008, de 3 de septiembre, pol que s’establez el currículu del segundu ciclu d’Educación Infantil (EI), el tratamientu que va recibir la nuesa llingua va ser más restrictiva de lo que la llei d’usu posibilita”. Na so opinión, arrequexa al idioma y ye una oportundiá perdida “de da-y puxu y normalidá dientro del sistema educativu”.

Ente les critiques que fai esti coleutivu ta que “el tiempu va ser solamente d’una hora selmanal; el profesoráu va ser el de Primaria siempre y cuando tenga la formación necesaria y cunten estos con disponiblidá horaria; y la so aplicación va facese secuencialmente en trés años hasta xeneralizase a tol alumnáu de 3, 4 y 5 años, col condicionante de la disponiblidá presupuestaria per parte de la conseyería”.

Contador Estadistiques