Educación entrugó al ministeriu pola especialidá d'asturianu depués de la orde d’Aragón, con otra nueva negativa

Ensin oficialidá nun va haber especialidá docente de Llingua Asturiana y Gallego-asturiano, o polo menos de la manera en que’l profesoráu d’estes materies tengan les mesmes condiciones y derechos que’l restu de maestros. La conseyera d’Educación, Lydia Espina, confirmó que recibió otra negativa del ministeriu al entrugar pola vía autonómica al conocer el movimientu fechu por Aragón.

“Cuando s’espublizó por parte del Gobiernu d’Aragón pa facer una orde pa la especialidá, inmediatamente, esa mesma mañana, volví a llamar al ministeriu pa que por favor me dixera si esta vía yera posible y tornaron a dicime que non. Y téngolo tamién per escrito”, rellató na tarde d'ayeri na Comisión d’Educación a una entruga d’Adrián Pumares “sobre qué actuaciones ta faciendo pa llograr que se cree la especialidá docente de Llingua Asturiana y Lliteratura”. Sicasí, anunció que, “viendo’l movimientu d’Aragón, vamos iniciar un procedimientu, ta yá mui avanzáu, esta selmana va llevase alantre, al Consultivu pa que nos dea una opinión a ver si esiste esa viabilidá. Nun nos rendimos”.

Esti pasu d’Aragón adáptase a la so situación educativa, yá que la la ‘Orden del Consejero de Educación, Cultura y Deporte por la que se establece la especialidá docente de lengua aragonesa’, agora n’información pública, nun daría la posibilidá al Gobiernu de sacar a oposición les places de maestros d’aragonés. La vía aragonesa namái permitiría a docentes que yá tuvieran plaza por otra especialidá superar una prueba pa poder dar clase de llingua aragonesa.

La modificación del Real Decretu d’Especialidaes por parte del Ministeriu d’Educación y Formación Profesional considérase la única vía p’algamar la especialidá docente de Llingua Asturiana y Gallego-asturiano, dalgo a lo que se niega Madrid ensin oficialidá y que, deféndese dende Asturies, podría facer ensin esti reconocimientu llegal pal idioma. Otra manera, hai espertos que consideren que tamién se podría desendolcar la so creación per vía autonómica.

El votu pa la oficialidá

Pumares pidió a la conseyera que diera cuenta del aconceyamientu que tuvo en Madrid cola ministra Pilar Alegría y la so opinión sobre’l ‘Informe sobre la competencia del Principáu d’Asturies pa regular l’usu de les llingües propies nel ámbitu educativu y afitar el réxime estatutariu del so personal docente con especial referencia a la creación de les especialidaes docentes de Llingua Asturiana y Gallego-asturiano”. “Nun hebo nenguna posibilidá al reconocimientu de la especialidá docente porque nos dicen que nun ye posible, nin pela vía autonómica como dicía l’informe que vusté m’entruga, nin pela vía nacional; que mientres nun tengamos oficialidá nun ye posible”, respondió.

Na so intervención Espina echó en cara a Pumares que nun diera’l so votu a favor de la oficialidá: “Digo-ylo ensin acritú, pero hai que priorizar si realmente ye tan importante como lo ye. Si priorizamos oxetivos políticos d’otru calter perriba y per delantre de la oficialidá de la nuesa llingua, tamos nesta situación. Vusté teníalo na so mano y nun taríamos falando d'esto”. Enantes el diputáu acusara al Gobiernu de “falta de voluntá política” na cuestión de la especialidá docente.

Tamién Nuria Rodríguez López, diputada de Podemos, sacara esti tema nuna entruga previa sobre l'idioma apuntando que l'informe citáu afita que ye posible que "al traviés de la voluntá política, ensin esperar qu'haya nengún tipu de resolución minesterial, nesti casu'l Gobiernu d'Asturies, la conseyería d'Educación, pueden facer el reconocimientu del asturianu". Espina señaló que "con oficialidá nun habría estos problemes" y treslladó la so respuesta a la so intervención posterior con Pumares, centrándose na respuesta al tema concretu plantegáu pola xixonesa.