Espina anuncia qu'a lo último d'esti añu'l B2 y el C1 yá van poder puntuar como méritu n'oposición

|
Lydia Espina aconceyamientu

La conseyera apuntó que'l decretu nuevu de formación ta agora en fase de revisión.

"Enantes de que fine l'añu yá tará tramitáu y yá será factible que puntúe", aseguró Lydia Espina, en referencia a la modificación del Decretu 62/2001, del 28 de xunu, que regula la formación permanente del profesoráu. Ésta ye la vía que dende la Conseyería d'Educación s'opta pa que los títulos de certificación de Llingua Asturiana adaptaos al Marcu Común Européu de Referencia pa les Llingües, hasta'l momentu namái convocaos de niveles B2 y C1, pueden puntuar como méritu n'oposiciones.

La falta d'oficialidá impide que l'asturianu tea nel llistáu d'idiomes qu'inclúi'l Real Decretu 1041/2017, del 22 d'avientu, qu'afita les esixencies mínimes de los niveles d'una serie de llingües ente les que tán les cooficiales, polo que contar con un títulu B2 o superior d'asturianu nun pue puntuar llegalmente na oposición al cuerpu de maestros. Poro, mientres llega dicha oficialidá, l'apartáu de la formación permanente del profesoráu ye onde podríen reconocese estes certificaciones de conocimientu de la llingua asturiana una vegada que se modifique'l decretu.

Espina fixo esta anuncia énte la entruga fecha por Nuria Rodríguez López na tarde d'ayeri na Comisión d'Educación "sobre les razones poles que l'asturianu nun computa como otros idiomes na baremación de puntuación nos procesos públicos d'accesu a la educación". "Hai discriminación del profesoráu d'asturiana a la hora de reconocer al mesmu nivel certificaciones que son emitíes pola Conseyería d'Educación y que nun tán consideraes como otres, idiomes que nun son oficiales equí n'Asturies y que, sicasí, computen a la hora d'opositar", criticó la diputada de Podemos, que yá preguntara por esta cuestión en marzu.

 

Contador Estadistiques